छत्रपती संभाजीराजेंनी ‘वेळ’ साधली; पण...!

 राम मगदूम ल्ल गडहिंग्लज किल्ले सामानगडचे गडकरी आणि जनता दलाचे ज्येष्ठ नेते श्रीपतराव शिंदे यांची कोल्हापूर संस्थानचे वारसदार संभाजीराजे यांनी लोकसभेचे मतदान अवघ्या दोन दिवसांवर असताना भेट घेतली. छत्रपती व शिंदे घराण्याचे निकटचे संबंध असतानादेखील दोन वर्षांपूर्वी झालेल्या पालिकेच्या निवडणुकीत शिंदेंच्या विरोधातील प्रचाराबद्दल ‘दिलगिरी’ व्यक्त करण्याबरोबरच आपले स्नेही व रयत यांना ‘संदेश’ देऊन वेळ साधली. तरीदेखील धनंजय महाडिक यांचा ‘नेम’ चुकला नाही. हेच या निकालावरून स्पष्ट झाले. गडहिंग्लज नगरपालिकेची निवडणूक होऊन तब्बल दोन वर्षे उलटल्यानंतर ‘दिलगिरी’ व्यक्त करण्यासाठी त्यांनी लोकसभा निवडणुकीचा मोका साधला. त्यामुळे गडहिंग्लजच्या प्रचारात संभाजीराजे कसे? याची जिल्हाभर पुन्हा चर्चा झाली. छत्रपतींची शेकडो एकर शेतजमीन गडहिंग्लज व परिसरात आहे. गडहिंग्लजच्या शिवाजी बोर्डिंग व बसवेश्वर बोर्डिंगसह १०० खाटांच्या रुग्णालयासाठी संपादित करण्यात आलेली जमीनही त्यांचीच. गडहिंग्लजकरांशी त्यांचे ऋणानुबंध असल्यामुळेच मंत्री हसन मुश्रीफ व बाबा कुपेकर यांनी त्यांना पालिकेच्या प्रचारात उतरविले होेते. गडहिंग्लजमध्ये दहा दिवस तळ ठोकून त्यांनी शिंदे यांच्या ताब्यातील नगरपालिका राष्ट्रवादीला जिंकून दिली. गेल्यावेळी लोकसभेच्या कोल्हापूरच्या दोन्ही जागा गमावल्यामुळे थोरल्या पवारांचा अपमान झाल्यामुळे पराभवाची जखम बांधून व्यथित मनाने राबलेल्या मुश्रीफ यांच्याप्रमाणे संभाजीराजेंनीही गतवेळच्या स्वत:च्या पराभवाचे ‘शल्य’ बाजूला ठेवून कष्ट उपसले. संभाजीराजे यांनी जनता दलाच्या ताब्यातील पालिका काढून राष्ट्रवादीच्या ताब्यात दिली. मात्र, या निवडणुकीत त्यांच्या नावाची साधी चर्चादेखील न झाल्यामुळेच त्यांनी यावेळी तटस्थपणाची भूमिका घेतली. मात्र, अवघ्या दोन दिवसांवर मतदान असतानाच त्यांनी ‘आपल्या’ गडकर्‍याजवळ मनमोकळं केलं आणि ‘गडहिंग्लज’मधील ‘रयतां’सह स्नेही मंडळींची भेट घेऊन खळबळ उडवून दिली होती.