केंद्र सरकारने साखर निर्यात धोरण खुले ठेवावे

विश्वास साखर कारखान्यात रोलर पूजन

सरूड : अडचणीत आलेला देशातील साखर व्यवसाय टिकवायचा असेल तर केंद्र सरकारने साखर निर्यात धोरण खुले ठेवून निर्यात साखरेचे अनुदानही कायम ठेवावे. साखरेची किमान किंमत ३ हजार ५०० रुपये करावी, असे प्रतिपादन आमदार मानसिंगराव नाईक केले.

चिखली येथील विश्वासराव नाईकसह साखर कारखान्यात रोलर पूजन व ८ मे. वॅट क्षमतेचे टर्बाईन बसवणे कामाचे भूमिपूजन झाले. त्यावेळी ते बोलत होते. कारखान्याचे उपाध्यक्ष, माजी आमदार बाबासाहेब पाटील-सरूडकर प्रमुख उपस्थित होते.

प्रारंभी कार्यकारी संचालक राम पाटील यांनी मान्यवरांचे स्वागत केले. संचालक विश्वास कदम यांच्या हस्ते रोलर पूजन झाले तर युवा नेते विराज नाईक यांच्या हस्ते ८ मे. वॅट क्षमतेचे टर्बाईन बसविणे कामाचे भूमिपूजन झाले.

आ. नाईक पुढे म्हणाले, सन २०२०-२१ कोरोना संसर्ग असतानाही कारखान्याने उत्कृष्ट कामगिरी करत गळीत हंगाम यशस्वी केला. यासाठी ऊस उत्पादक शेतकरी, सभासदांनी मोठे सहकार्य केले. या हंगामातील गाळप उसाला आतापर्यंत पाहिले व दुसऱ्या बिलाच्या माध्यमातून २ हजार ७५० रुपये अदा केले आहेत. अंतिम बिल दीपावलीस देऊन दीपावली गोड करणार आहे.

यावेळी जि. प. चे बांधकाम व आरोग्य सामितीचे सभापती हंबीरराव पाटील, राजेंद्रसिंह नाईक, संचालक सर्वश्री. विजयराव नलवडे, दत्तात्रय राणे, शामराव मोहिते, यशवंत दळवी, यांच्यासह सर्व संचालक, खातेप्रमुख, विभागप्रमुख, सभासद, कर्मचारी आदी उपस्थित होते.

फोटो ओळी : '

चिखली येथे विश्वास कारखान्यात रोलर पूजन व ८ मे. वॅट क्षमतेचे टर्बाईन बसवण्याच्या कामाचे भूमिपूजन करताना प्रसंगी अध्यक्ष, आमदार मानसिंगराव नाईक, उपाध्यक्ष माजी आमदार बाबासाहेब पाटील-सरूडकर , राजेंद्रसिंह नाईक, युवा नेते विराज नाईक व संचालक मंडळ आदी.