बसस्थानकास गुढीपाडव्यापर्यंत महाराजांचे नाव द्यावे

:आमदार प्रकाश आवाडे

लोकमत न्यूज नेटवर्क

इचलकरंजी : येथील मध्यवर्ती बसस्थानकास छत्रपती शिवाजी महाराज यांचे नाव देण्यास कोणाचीही अडचण नाही. त्यामुळे शासनाने याप्रश्नी गुढीपाडव्यापर्यंत निर्णय घ्यावा तसे न झाल्यास शिवप्रेमी मावळे त्याठिकाणी गुढी उभारतील, असा इशारा आमदार प्रकाश आवाडे यांनी दिला. तसेच मलाबादे चौकाचे नाव न बदलता छत्रपती संभाजी महाराज यांचा पुतळा उभारण्यात यावा, अशीही मागणी त्यांनी केली.

आमदार आवाडे म्हणाले, मध्यवर्ती बसस्थानक परिसरात शिवतीर्थ येथे छत्रपती शिवाजी महाराजांचा अश्वारूढ पुतळा आहे. त्यामुळे बसस्थानकास छत्रपती शिवाजी महाराजांचे नाव द्यावे, अशी मागणी प्रलंबित आहे. याबाबत आंदोलनही केले. याची दखल घेत मंत्र्यांनी याबाबत निर्णय घेण्याची ग्वाही दिली; पण त्याबाबत कोणताच निर्णय झाला नाही. तरी गुढीपाडव्यापूर्वी हा निर्णय व्हावा; अन्यथा त्यादिवशी शिवप्रेमी मिळून त्याठिकाणी गुढी उभारतील. तसेच के. एल. मलाबादे चौकाचे नाव न बदलता या चौकात छत्रपती संभाजी महाराजांचा पुतळा उभारावा, ही मागणीसुद्धा प्रलंबित आहे. यासंदर्भात सर्वांनी एकजूट होऊन हे प्रश्न नेण्यास प्रयत्न करूया.

यावेळी माजी आमदार राजीव आवळे, पं. स. चे माजी सभापती महेश पाटील, राजू मगदूम, राकेश मगदूम, किरण माने, मिलिंद गवळी, रणजित शिंदे, अनिकेत कानुगडे, आदी उपस्थित होते.