भरधाव बसची जीपला धडक

शिवाजी विद्यापीठ चौकातील घटना : चार वर्षांच्या बालकासह नऊजण गंभीर जखमी

कोल्हापूर : शरदवाड (ता. कागल) येथे नातवाच्या बारशाला चाललेल्या जीपला भरधाव ट्रॅव्हल्स्ने शिवाजी विद्यापीठ चौकात जोराची धडक दिल्याने जीपमधील चार वर्षांच्या मुलासह नऊजण गंभीर जखमी झाले. जखमींना तातडीने सीपीआरमध्ये दाखल करण्यात आले. हा अपघात दुपारी साडेतीनच्या सुमारास घडला. मार्गावरील सुमारे तासभर वाहतूक खोळंबली होती. राजारामपुरी पोलिसांनी घटनास्थळी येऊन पंचनामा करून वाहतूक सुरळीत केली.
जखमींची नावे अशी, सुशीला विठ्ठल पुजारी (वय ५०), सखुबाई कृष्णा पुजारी (४०), आंबुबाई शरद पुजारी (३५), बाळाबाई सुबाना रानगे (४०), सखुबाई नारायण धनगर (६०), आक्काताई सखाराम पुजारी (६०), नवसाबाई माळू पुजारी (४०), बाबासो विठ्ठल पुजारी (३२), राज काशिनाथ पुजारी (४, सर्व रा. वाशी, ता. करवीर) अशी त्यांची नावे आहेत. या अपघाताची माहिती समजताच वाशी व शरदवाड येथील नातेवाइकांनी सीपीआरमध्ये गर्दी केली होती. सुशीला पुजारी व सखुबाई पुजारी यांची प्रकृत्ती चिंताजनक बनल्याने त्यांना राजारामपुरीतील खासगी रुग्णालयात हलविण्यात आले.
याबाबत पोलिसांनी सांगितले, वाशी येथील कृष्णात पुजारी यांच्या नातवाच्या बारशाच्या कार्यक्रमासाठी भावकीतील महिला जीपमधून शरदवाडकडे निघाल्या होत्या. जीप बाबासो पुजारी हा चालवित होता. शिवाजी विद्यापीठ चौकात येताच निपाणीकडून कोल्हापूरकडे येणाऱ्या भरधाव खासगी ट्रॅव्हल्स्ने जीपला जोराची धडक दिली. यामध्ये जीपचे मोठ्या प्रमाणात नुकसान होऊन त्यातील चार वर्षांच्या बालकासह महिला गंभीर जखमी झाल्या. डोक्याला, हाता-पायाला गंभीर दुखापत झाल्याने महिलांच्या आक्रोशाने परिसर हादरून गेला. विद्यापीठ परिसरातील नागरिकांनी अपघातस्थळी गर्दी केली. जखमींना जीपमधून बाहेर काढून मिळल त्या वाहनाने सीपीआरला पाठवून दिले. दरम्यान, अपघात होताचा ट्रॅव्हल्सचा चालक पसार झाला. याप्रकरणी राजारामपुरी पोलीस ठाण्यात नोंद झाली असून, रात्री उशिरापर्यंत गुन्हा दाखल करण्याचे काम सुरूहोते. (प्रतिनिधी)