रक्तपेढ्या ऑक्सिजनवर, आठ दिवस पुरेल एवढाच साठा

कोल्हापूर : कोरोनाबाबतचे लसीकरण सुरू झाल्याने रक्तदान करणाऱ्यांची संख्या झपाट्याने घटत आहे. त्यामुळे रक्ताचा तुटवडा निर्माण होणार आहे. कोल्हापुरात सध्या आठ दिवस पुरेल एवढाच रक्त पिशव्यांचा साठा आहे.

जिल्ह्यात जानेवारीच्या दुसऱ्या पंधरवड्यात लसीकरण सुरू झाले. सध्या लसीकरणाचा वेग वाढला असून, रोज सुमारे १५ हजार जणांचे लसीकरण होत आहे. लस घेतल्यानंतर संबंधिताला दोन महिने रक्तदान करता येत नाही. त्यामुळे रक्तदान करणारे कमी होत आहेत. त्याचा परिणाम रक्त उपलब्धतेवर होणार आहे. सीपीआरसह अन्य १२ रक्तपेढ्यांमध्ये सध्या १६३१ रक्तपिशव्यांचा साठा शिल्लक आहे. त्यामुळे लस घेण्यापूर्वी नागरिकांनी रक्तदान करावे, असे आवाहन सर्व रक्तपेढ्यांच्या वतीने करण्यात आले आहे.

चौकट

सीपीआर रक्तपेढीत आठ दिवसांचा साठा

सीपीआर रुग्णालयातील रक्तपेढीमध्ये १४३ रक्त पिशव्या, तर अन्य अकरा रक्तपेढ्यांमध्ये १४८८ पिशव्या शिल्लक आहेत. त्या पुढील आठ दिवस पुरतील. त्यानंतर रक्ताचा तुटवडा भासणार आहे. त्यामुळे नागरिकांनी लसीकरणाआधी रक्तदान करावे, असे आवाहन जिल्हा रक्त संकलन समन्वय अधिकारी दीपा शिपूरकर यांनी शुक्रवारी केले.

चौकट

‘जीवनधारा’मध्ये २२० पिशव्या

जीवनधारा ब्लड बँकेमध्ये दि. १ ते १५ मार्चमध्ये ६५१, तर दि. १६ मार्च ते दि. २ एप्रिल या कालावधीत ५८७ रक्त पिशव्यांचे संकलन झाले. सध्या २२० पिशव्या शिल्लक आहेत.

चौकट

‘अर्पण’मध्ये १२५ पिशव्या

लक्ष्मीपुरी परिसरातील अर्पण ब्लड बँकेमध्ये दि. १ ते १५ मार्च या कालावधीत ५९७, तर शुक्रवारअखेर ४७२ पिशव्यांचे संकलन झाले. सध्या १२५ पिशव्या शिल्लक आहेत.

चौकट

राजर्षी ब्लड बँकेत ६३ पिशव्या

शाहुपुरीतील राजर्षी शाहू ब्लड बँकेमध्ये मार्चच्या पहिल्या पंधरवड्यात १६८, तर दुसऱ्या पंधरवड्यामध्ये १२२ पिशव्यांचे संकलन झाले. सध्या ६३ पिशव्या शिल्लक आहेत.

चौकट

लसीकरणाआधी करा रक्तदान

कोरोनाचे लसीकरण झालेली व्यक्ती दोन महिने रक्तदानासाठी अपात्र ठरणार आहे. रक्त आणि रक्तघटकांच्या मागणीत वाढ होत आहे. लसीकरणाचे नियोजन केले जात असल्याने पूर्वनियोजित रक्तदान शिबिरे रद्द होत आहेत. त्यामुळे रक्तपेढ्यातील साठा संपत आला आहे. जिल्हा प्रशासनाने लोकप्रतिनिधी, औद्योगिक संस्थांना रक्तदान शिबिरांच्या आयोजनासंदर्भात विशेष आवाहन करावे, असे कोल्हापूर जिल्हा ब्लड बँक असोसिएशनचे अध्यक्ष प्रकाश घुंगुरकर यांनी केले.

अन्य रक्तपेढीमधील शिल्लक साठा (पिशव्यांमध्ये)

संजीवन ब्लड बँक : ३४३

केएमसी ब्लड बँक : ४३

तुलसी ब्लड बँक : १९१

वैभवलक्ष्मी ब्लड बँक : ११७

अण्णासाहेब गळदगे ब्लड बँक : १८२

लायन्स ब्लड बँक : ९१

डॉ. डी. वाय. पाटील ब्लड बँक : २८

आधार ब्लड बँक : ८५

===Photopath===

020421\02kol_3_02042021_5.jpg~020421\02kol_4_02042021_5.jpg

===Caption===

डमी फोटो (०२०४२०२१-कोल-ब्लड बँक)~ (०२०४२०२१-कोल-ब्लड बँक डमी)