पूरग्रस्त गावाकडे परतू लागले

संदीप बावचे :

लोकमत न्यूज नेटवर्क

शिरोळ : पुराचे पाणी ओसरू लागल्याने स्थलांतरित पूरग्रस्त आता गावाकडे परतू लागले आहेत. मात्र, महापुराच्या पाण्यामुळे उद्ध्वस्त झालेला संसार कसा उभारायचा, महापुराने झालेले मोठे नुकसान कसे भरुन निघणार, असे प्रश्न घेऊन पुन्हा संसार उभा करण्यासाठी जड अंत:करणाने पूरग्रस्त गावाकडे येत आहेत.

महापुरामुळे शिरोळ तालुक्यातील शेतीला मोठा फटका बसला आहे. ऊस, भाजीपाला, सोयाबीन, भुईमूग या पिकांचे मोठे नुकसान झाले आहे. शिरोळ तालुक्यात ५५ गावे असून, यापैकी ४३ गावांना महापुराचा फटका बसला आहे. यात २४ गावांचा संपर्क तुटून १३ गावे पाण्याखाली गेली तर ७९ हजार पूरग्रस्तांनी स्थलांतर केले होते.

महापुराचे पाणी शुक्रवार (दि. २३)पासून वाढू लागले तसे चिंचवाडपासून खिद्रापूरपर्यंतच्या गावातील पूरग्रस्त स्थलांतरित होऊ लागले. प्रशासनाच्या सतर्कतेमुळे वेळीच ग्रामस्थ स्थलातंरित झाले. पै-पाहुणे, नातेवाईक यांच्याकडे साठ टक्क्यांहून अधिक नागरिकांनी आश्रय घेतला तर ४४ छावण्यांमध्ये १५ हजारहून अधिक पूरग्रस्त वास्तव्याला आले. काहींनी भाड्याची घरेदेखील शोधली. मागील अनुभव पाहता यावेळच्या पुरामध्ये पूरग्रस्तांनी जास्तीत जास्त जनावरे गावाबाहेर काढल्याचे चित्र पाहायला मिळाले. ३० हजारहून अधिक जनावरे सुरक्षितस्थळी हलविण्यात आली. दरम्यान, पूर ओसरत असल्याने पूरग्रस्त गावाकडे परतत आहेत तर काही पूरग्रस्त छावणी व नातेवाईकांकडे वास्तव्याला आहेत. मात्र, शुक्रवारी सायंकाळनंतर झालेल्या पावसामुळे पूरग्रस्तांमध्ये पुन्हा भीती निर्माण झाली आहे.

चौकट.. दु:ख सावरत उभारी

गेल्या दीड वर्षापासून कोरोना महामारीने मोठे नुकसान केले. त्यातच पुन्हा एकदा महापुराने होत्याचे नव्हते केले आहे. कष्टाने पिकवलेली शेती, संसार, व्यवसाय उद्ध्वस्त झाल्याने शेतकरी, शेतमजूर, कष्टकऱ्यांच्या दुःखाला पारावरच राहिला नाही. हे दुःख विसरुन नव्या जोमाने सावरण्याचा प्रयत्न पूरग्रस्त करत आहेत.

फोटो ओळ : औरवाड (ता. शिरोळ) येथून नृसिंहवाडीकडे पुराच्या पाण्यातून मार्ग काढत वयोवृध्द आजी-आजोबांनी प्रवास केला. (छाया : सुभाष गुरव)