कर्करोगाविषयी सजग राहिले पाहिजे

जयसिंगपूर : १४ ते १६ वर्षावरील किशोरवयीन मुलांमध्ये तंबाखू सेवन व मद्यपानाचे प्रमाण वाढत चाललेले आहे. त्यामुळे त्यांच्यामध्ये गँगरीन, यकृत कुजणे, आतडी खराब होणे आदी आजार दिसून येत आहेत. तसेच स्त्रियांमध्ये गर्भाशय व स्तनांचा कर्करोग वाढत चालला आहे. कर्करोगाविषयी आपण सजग असले पाहिजे, असे प्रतिपादन डॉ. उदयसिंह माने यांनी केले.

येथील जनतारा कल्पवृक्ष विद्यामंदिर व नांद्रेकर ज्युनिअर कॉलेजमध्ये ‘कर्करोग व मानसिक आरोग्य आणि विकार’ याविषयी विद्यार्थ्यांना मार्गदर्शनप्रसंगी ते बोलत होते. स्वागत विरेंद्र बाऊचकर यांनी केले.

यावेळी सामाजिक कार्यकर्त्या चारुशीला भास्कर म्हणाल्या, शारीरिक आरोग्यासाठी व्यायाम, योगाभ्यास, प्राणायाम व मानसिक आरोग्यासाठी मौन, चिंतन, विचारांमध्ये बदल करणे, परिस्थितीशी जुळवून घेणे, चांगल्या आरोग्यासाठी ऋतुमानानुसार आपला आहार असावा. तरच आपले आरोग्य सुदृढ राहील. याप्रसंगी मुख्याध्यापक दीपक वाडकर यांच्यासह शिक्षक, शिक्षकेतर कर्मचारी, विद्यार्थी उपस्थित होते. अशोक अथणे यांनी आभार मानले.