अंबाबाई मंदिरातील बेसॉल्ट फरशी सुस्थितीत

कोल्हापूर : करवीरनिवासिनी श्री अंबाबाई मंदिरातील संगमरवरी फरशीखाली दडलेली बेसॉल्ट दगडी फरशी सुस्थितीत असल्याचा निर्वाळा मंगळवारी तज्ज्ञांनी दिला. त्यावरील संगमरवरी फरशी काढण्यासाठीचा प्रस्ताव देवस्थान समितीकडून हेरिटेज समितीला पाठविण्यात आला आहे. आज, बुधवारी होणाऱ्या बैठकीत यावर निर्णय घेतला जाईल.

अंबाबाई मंदिरातील पितळी उंबऱ्याबाहेर, कासव चौक व गणपती मंदिर चौकात संगमरवरी फरशी घालण्यात आली आहे. मंदिराचे मूळ स्वरूप उजेडात आणण्यासाठी ही फरशी काढण्याची शिफारस हेरिटेज समितीच्या अध्यक्षा अमरजा निंबाळकर यांनी देवस्थान समितीकडे केली होती. त्यानुसार मंगळवारी त्यांच्यासह देवस्थान समितीचे सचिव शिवराज नायकवडी यांच्या उपस्थितीत तज्ज्ञांमार्फत येथील कासव चौकातील दोन व सरस्वती मंदिर येथील एक अशा तीन ठिकाणच्या संगमरवरी फरशा काढण्यात आल्या. या सर्वच ठिकाणी मूळ बेसॉल्ट दगडी फरशी सुस्थितीत असल्याचे आढळले आहे. त्यामुळे वरील संगमरवरी फरशी काढून टाकण्याची परवानगी मिळावी, अशी मागणी देवस्थान समितीने हेरिटेज समितीकडे केली आहे. आज, बुधवारी हेरिटेज समितीची बैठक होणार असून त्यात याबाबत निर्णय घेण्यात येईल.

--