बिद्री साखर कारखान्यात तरुणावर हल्ला

लोकमत न्यूज नेटवर्क

सरवडे : बिद्री साखर कारखान्याची मळी वाहतूक करणारा ट्रॅक्टर पुढे घेण्याच्या कारणावरून कारखाना हद्दीत दोघा ट्रॅक्टरचालकांमध्ये वाद झाला. त्यातून तरुणावर कात्रीने वार केल्याने एकजण गंभीर जखमी झाला. उदय उत्तम चौगले (वय २५, रा. बिद्री) असे यामध्ये जखमी झालेल्या ट्रॅक्टरचालकाचे नाव आहे तर आरोपी हा अल्पवयीन असून त्याला मुरगूड पोलिसांनी ताब्यात घेतले आहे. याबाबत घटनास्थळावरुन समजलेली माहिती अशी, बिद्री साखर कारखान्यातील मळ वाहतूक करण्यासाठी उदय चौगले व संशयित आरोपी हे दोघेजण आपले ट्रॅक्टर घेऊन रांगेत थांबले होते. यावेळी ट्रॅक्टर पुढे घेण्याच्या कारणावरुन या दोघांमध्ये वाद झाला. यातूनच संशयिताने कात्रीने उदयच्या डाव्या कानाच्या मागे, पाठीत तसेच छातीवर वार केले. त्यामुळे तो गंभीर जखमी होऊन जागेवर कोसळला.

नातेवाईकांनी जखमी उदयला तातडीने कोल्हापुरातील खासगी दवाखान्यात उपचारासाठी दाखल केले आहे. घटनेची माहिती मिळताच मुरगूड पोलिसांनी घटनास्थळी भेट देऊन जागेचा पंचनामा केला. त्यातील संशयित आरोपीला त्याच्या राहत्या घरातून ताब्यात घेतले असून तो अल्पवयीन असल्याचे समजते.

सदर घटनेचा तपास मुरगूडचे सपोनि विकास बडवे यांच्या मार्गदर्शनाखाली पीएसआय कुमार ढेरे, बीट अंमलदार प्रशांत गोंजारे करत आहेत.

बिद्री साखर कारखान्याच्या गाडीअड्ड्यातून ट्रॅक्टर चोरीला

येथील साखर कारखान्याच्या गाडी अड्ड्यातून ट्रॅक्टर चोरीला गेल्याची घटना आज घडली. कारखाना प्रशासनाने ऊस वाहतूक करणाऱ्या वाहनांच्या सुरक्षेसाठी कोणत्याही उपाययोजना केलेल्या नाहीत. कारखाना आवारात एकाच दिवशी घडलेला खुनी हल्ला आणि ट्रॅक्टर चोरीच्या घटनेमुळे कारखाना प्रशासनाविषयी संताप व्यक्त होत आहे.