कोविड मृतदेहाच्या अंत्यसंस्कारासाठी १२ टन लाकडाची मदत

गडहिंग्लज : कौलगे (ता. गडहिंग्लज) येथील ग्रामपंचायत व नाळ फौंडेशन यांच्या संयुक्त विद्यमाने गडहिंग्लज पालिकेला १२ टन लाकूड व पाच हजार शेण्यांची मदत दिली. कोविड मृतदेहावर गडहिंग्लज येथील स्मशानभूमीत अंत्यसंस्कार करण्यात येत आहेत. अंत्यसंस्कारासाठी लाकूड, शेणी, आदी साहित्य मोठ्या प्रमाणात कमी पडत आहे. त्यासाठी लाकडे, शेणी, आदी साहित्य मदत करावे, असे आवाहन उपनगराध्यक्ष महेश कोरी यांनी केले होते. त्यास प्रतिसाद देत कौलगे ग्रामस्थांनी ही मदत दिली.

यावेळी सरपंच, उपसरपंच, ग्रामपंचायत सदस्य व फौंडेशनचे कार्यकर्ते उपस्थित होते.

दरम्यान, फौंडेशनने कोविडमुळे मृत्यू पावलेल्या सहा कुटुंबीयांच्या नातेवाइकांना ३५ हजारांची मदत व आठ हजार रुपयांचे कौटुंबिक साहित्य दिले आहे. मृत झालेल्या कुटुंबप्रमुखांच्या दोन्ही मुलांच्या दहावीपर्यंतच्या शिक्षणाची जबाबदारीही फौंडेशनने उचलली आहे.

संस्थात्मक अलगीकरणात असणाऱ्यांना सिंगल कीट व स्वयंपाक करून खाणाऱ्यांना फॅमिली कीटसह, आदी साहित्य देण्यात आले आहे.

फोटो ओळी : कौलगे (ता. गडहिंग्लज) येथील गावकऱ्यांच्या मदतीतून जमा झालेली लाकडे व शेणी गडहिंग्लजकडे पाठविण्यात आली. यावेळी ग्रामपंचायत पदाधिकारी व नाळ फौंडेशनचे कार्यकर्ते उपस्थित होते.

क्रमांक : २३०५२०२१-गड-०८