शिवाजी पेठेत सशस्त्र हल्ला, एकजण गंभीर जखमी

सुभाष हा बोलू शकत नसल्यामुळे हल्ला कोणी केला याबाबत नेमकी माहिती रात्री उशिरापर्यंत मिळालेली नाही. सुभाष देवकर हा देवस्थान समितीकडे सुरक्षा रक्षक म्हणून काम करतो. त्याने सकाळी सहा ते दुपारी दोन अशी ड्युटी केली. रात्री दहा वाजता निवृत्ती चौकाकडून तो फिरंगाई तालीमकडे जात असताना महाराष्ट्र हायस्कूलजवळ अज्ञाताने त्याला गाठले. त्याच्या डोक्यावर व तोंडावर असे दोन तीक्ष्ण हत्याराने वार केले. अचानक झालेल्या हल्ल्यात गंभीर झाल्यामुळे सुभाष तेथेच कोसळला. अज्ञाताने तेथून पलायन केले. रस्त्यावरून जाणाऱ्या काहीजणांनी त्याला रिक्षातून सीपीआर रुग्णालयात उपचारासाठी दाखल केले.

जोराचे वार झाल्याने रक्तस्राव मोठ्या प्रमाणात झाला असून सुभाष हा बेशुद्ध आहे. त्याच्यावर सीपीआरमध्ये प्राथमिक उपचार केल्यानंतर रात्री साडेअकरा वाजता खासगी रुग्णालयात दाखल करण्यास आले. हा हल्ला कोणी केला याबाबत पोलीस तपास करत आहेत. परिसरातील सीसीटीव्ही फुटेज तपासण्यात आल्यानंतर नेमके काय घडले याचा उलगडा होईल, असे पोलिसांनी सांगितले. देवकर यांच्या मित्रांनी रुग्णालयात मोठी गर्दी केली होती.