अण्णा मोगणे, मयूर स्पोर्टस् अंतिम फेरीत

संजय देसाई स्मृती चषक

कोल्हापूर : अण्णा मोगणे सहारा स्पोर्टस्ने युनायटेड स्पोर्टस्चा पराभव करीत, तर मयूर स्पोर्टस्ने फायटर्स स्पोर्टस्चा पराभव करीत कै. प्रा. संजय देसाई स्मृती टी-२० चषक क्रिकेट स्पर्धेची अंतिम फेरी गाठली.
शाहूपुरी जिमखाना येथे आज, शुक्रवारी सकाळच्या सत्रातील पहिला सामना अण्णा मोगणे सहारा विरुद्ध युनायटेड स्पोर्टस् यांच्यात झाला. प्रथम फलंदाजी करताना अण्णा मोगणे सहारा संघाने १७ षटकांत ७ बाद १६९ धावांचे आव्हान युनायटेड स्पोर्टस् संघासमोर ठेवले. मोगणे संघाकडून युवराज यवलूस्करने ३३ धावा, तर सूरज शिंदे याने १७ चेंडूंत ३७ धावा केल्या. युनायटेडकडून सागर मेतकेने तीन, तर योगेश कळंत्रेने दोन बळी घेतले.
उत्तरादाखल खेळताना फलंदाजीस आलेल्या युनायटेड संघाला हे आव्हान पेलवले नाही. मोगणे संघाच्या महेश पाटीलच्या भेदक गोलंदाजीसमोर युनायटेडचा निम्मा संघ गारद झाला. महेशला विकास जाधव व अतीश वरपे यांनी प्रत्येकी दोन बळी घेत मोलाची साथ देत युनायटेडला १७ षटकांत सर्वबाद १२५ धावांतच गारद करीत विजयावर शिक्कामोर्तब केले.
दुसरा सामना मयूर स्पोर्टस् विरुद्ध फायटर्स स्पोर्टस् यांच्यात झाला. मयूर स्पोर्टस्ने प्रथम फलंदाजी करताना १७ षटकांत ६ बाद १६४ धावा केल्या. यामध्ये अमोल निळुगडेने ३३ धावा, तर वैभव पाटील याने नाबाद २६ धावा केल्या. फायटर्सकडून आसिमपीर मुजावर यांने चार बळी घेतले.
उत्तरादाखल फलंदाजीस आलेल्या फायटर्स संघाच्या फलंदाजांचा कणा मयूर संघाच्या अमोल निळुगडे, नजीर शेख, प्रसाद पाटील, संदीप साळोखे यांनी मोडला. त्यामुळे १५ षटकांत १०९ धावांत फायटर्सचा संघ गारद झाला. यामध्ये विशाल कुकडे याने ३० धावा करीत एकाकी झुंज देण्याचा प्रयत्न केला. मात्र, भेदक गोलंदाजीपुढे फायटर्सचा टिकाव लागला नाही.
अखेर सामना ५५ धावांनी जिंकत अंतिम फेरी गाठली. अंतिम फेरीत मयूर संघाची गाठ अण्णा मोगणे संघाशी पडणार आहे.