अनंत माने स्मृती महोत्सव

चित्रपट महामंडळ : मंगळवारपासून आठ चित्रपट दाखवणार

कोल्हापूर : दिग्दर्शक, निर्माते, लेखक आणि संकलक म्हणून मराठी चित्रपटसृष्टीवर अधिराज्य गाजविलेल्या अनंत माने यांच्या जन्मशताब्दीनिमित्त अखिल भारतीय मराठी चित्रपट महामंडळातर्फे मंगळवारपासून (दि. १ सप्टेंबर) तीन दिवसांच्या चित्रपट महोत्सवाचे आयोजन करण्यात आले आहे, अशी माहिती उपाध्यक्ष मिलिंद अष्टेकर व कार्यवाह सुभाष भुरके यांनी पत्रकार परिषदेत दिली. या महोत्सवात प्रेक्षकांना अनंत माने यांनी दिग्दर्शित केलेले आठ चित्रपट पाहता येतील. शाहू स्मारक भवनमध्ये सकाळी साडेअकरा वाजता खासदार धनंजय महाडिक यांच्या हस्ते महोत्सवाचे उद्घाटन होईल. त्यानंतर १३१ आठवड्यांचा विक्रम असलेल्या ‘सांगत्ये ऐका’ या चित्रपटाने महोत्सवाला प्रारंभ होईल. बुधवारी (दि.२ सप्टेंबर) दुपारी ३ वाजता चित्रपट व्यावसायिकांचा मेळावा होईल. गुरुवारी (दि. ३ सप्टेंबर) दुपारी चारला पालकमंत्री चंद्रकांत पाटील यांच्या उपस्थितीत समारोप होईल. हा महोत्सव सर्व रसिकांसाठी मोफत असून विनामूल्य प्रवेशिका सोमवारी (दि.३१) देवल क्लबसमोरील महामंडळाच्या कार्यालयात उपलब्ध असतील. ज्येष्ठांना मानधन महामंडळातर्फे ज्येष्ठ व गरजू कलाकार व तंत्रज्ञांना प्रत्येक महिन्याला मानधन दिले जाणार आहे. सुरुवातीच्या टप्प्यात महिन्याला पाचशे यानुसार तीन महिन्यांतून एकदा महामंडळातर्फे खात्यावर रक्कम जमा केली जाईल. कोल्हापूरसह पुणे, मुंबई आणि इतर जिल्ह्णांतील अशा कलाकार-तंत्रज्ञांसाठीही ही योजना असेल. सुरुवातीच्या टप्प्यात ५१ कलाकारांना मानधनाचे वितरण सुरू होईल. त्याचा प्रारंभ महोत्सवाच्या समारोप सोहळ्यात होईल. दरम्यान, महामंडळाच्या स्थापनेत तसेच कोल्हापूर चित्रनगरीच्या स्थापनेत अनंत माने यांचा पुढाकार होता. चित्रनगरीचे काम पूर्ण करून त्यांना खरी आदरांजली वाहण्याचा निर्धारही यावेळी झाला. पत्रकार परिषदेला सतीश बिडकर, इम्तियाज बारगीर, सदानंद सूर्यवंशी, बाळू बारामती आदी उपस्थित होते. महोत्सवातील चित्रपट मंगळवार (दि.१ सप्टेंबर)दुपारी १२ वाजता : सांगत्ये ऐकादुपारी चार वाजता : धाकटी जाऊसायंकाळी सहा वाजता : रंगपंचमी बुधवारी (दि.२, सप्टेंबर) सकाळी साडेदहा वाजता : सवाल माझा ऐकासायंकाळी सहा वाजता : केला इशारा जाता-जाता दुपारी तीन वाजता : चित्रपट व्यावसायिकांचा मेळावा. गुरुवारी (दि.३, सप्टेंबर) सकाळी साडेदहा वाजता : एक गाव बारा भानगडीदुपारी एक वाजता : अशीच एक रात्र होती, रात्री आठ वाजता : सुशीला