आजरा पोलिसांनी ९ लाख ७५ हजारांची पकडली गोवा बनावटीची दारू

आजरा : गोवा बनावटीची ९ लाख ७५ हजार १३२ रुपयांची दारू टाटा कंपनीच्या ट्रकच्या मागील हौदातील कप्प्यातून आणताना आजरा पोलिसांनी अहमदनगरच्या दोघांना दारूसह पकडले. कारवाई आजरा-आंबोली रस्त्यावरील हॉटेल तुळशीसमोर रात्री साडेदहा वाजण्याच्या सुमारास ही कारवाई करण्यात आली. पोलिसांनी टेम्पो-ट्रक व गोवा बनावटीची दारू जप्त करून आरोपींना ताब्यात घेतले आहे.

आजरा पोलीस रात्री आजरा-आंबोली रस्त्यावर गस्त घालत असताना हॉटेल तुळशीच्यासमोर गोव्याकडून येणारा टेम्पो-ट्रक अडविला. टेम्पो-ट्रकची तपासणी करता आरोपींनी गाडीच्या चोर कप्प्यात गोवा बनावटीची दारू लपविली असल्याचे लक्षात आले.

पोलिसांनी ३ लाख ७१ हजार प्रुपयांची मॅकडॉल व्हिस्कीचे १२१ बॉक्स, ९७ हजार ९२० रुपयांचे रॉयल चॅलेंज, व्हिस्कीचे २४ बॉक्स, ५ लाख रुपयांचा चॉकलेटी रंगाचा टेम्पो ट्रक, ५ हजार रुपयांचा ओपो कंपनीचा व ५०० रुपयांचा कार्बन कंपनीचा मोबाईल जप्त केला आहे.

टेम्पो ट्रकचा चालक शिवाजी ग्यानबा भुते (वय ४३), गणेश महादेव पिंगळे (वय ४०, दोघेही रा. खर्डा, ता. जामखेड, जि. अहमदनगर) यांना आजरा पोलिसांनी ताब्यात घेतले आहे. ही कारवाई पोलीस उपनिरीक्षक युवराज जाधव, फौजदार नाथा पाटील, पोलीस हेडकॉन्स्टेबल अमोल पाटील, अमर आडसोळे, चेतन घाटगे यांनी केली.

कोल्हापूर जिल्ह्यात जिल्हाधिकारी यांचे कोरोना रोगाचे अनुषंगाने संचारबंदी आहे. या आदेशाचा भंग करून बेकायदेशीररीत्या महाराष्ट्राचा कर चुकवून गोवा बनावटीची दारू विक्री करण्याच्या उद्देशाने वाहतूक करीत असताना टेम्पो-ट्रकसह दारू पकडण्यात आली आहे. अधिक तपास पोलीस उपनिरीक्षक युवराज जाधव करीत आहेत.

* फोटो ओळी : आजरा पोलिसांनी ९ लाख ७५ हजारांची गोवा बनावटीच्या जप्त केलेल्या दारू व आरोपीसोबत पोलिसांचे पथक.

क्रमांक : ३१०५२०२१-गड-०१