आजऱ्यात तरुणांसह महिलांनी केली रंगांची उधळण

आजरा : आजरा शहरात आज पोलीस प्रशासनाचा प्रतिबंध झुगारत रंगपंचमीचा उत्सव तरुणाईने साजरा केला. आपापल्या गल्लीमध्ये लहान मुलांसह तरुणाई व महिलांनी रंगपंचमीमध्ये विविध रंगांची उधळण केली. गेल्या अनेक वर्षांपासून आजऱ्याची रंगपंचमी गुढीपाडव्याच्या अगोदरच्या दिवशी होते.

कोरोनाचा प्रादुर्भाव वाढत असल्याने रंगपंचमी रस्त्यावर येऊन साजरी करू नये, अन्यथा कारवाई करण्याचे आदेश पोलीस प्रशासनाने दिले होते. मात्र सर्वच ठिकाणी या आदेशाला केराची टोपली दाखवत तरुणाईने रंगांचा उत्सव प्रतिवर्षाप्रमाणे साजरा केला. अनेक गल्ल्यांमध्ये महिलांनी एकमेकींना रंग लावत, आपणही रंगपंचमीत सहभागी असल्याचे दाखवून दिले. लहान मुलांनी सकाळी नऊ वाजल्यापासूनच रंगाची पिचकारी मारण्यास सुरुवात केली होती. तरुणाईने आपल्या मित्रपरिवाराला रंगपंचमीत विविध रंगांची अक्षरश: अंघोळ घातली. आजरा शहरातील प्रमुख मार्ग वगळता सर्वत्र रंगांची उधळण करण्यात आली.

वीकेंड लॉकडाऊननंतर आज आजऱ्यात नागरिकांनी खरेदीसाठी गर्दी केली होती. सोशल डिस्टंसिंगचा यावेळी फज्जा उडाला. अनेक नागरिकांनी तोंडाला मास्कही घातले नव्हते. नगरपंचायत प्रशासन व पोलिसांनीही यावेळी बघ्याची भूमिका घेतली. मात्र तालुक्यात सर्वच गावांमध्ये कोरोनाचे रुग्ण वाढत असताना, अशा प्रकारची बेफिकिरी भविष्यात अडचणीची ठरणार आहे.

फोटोगॅलरी -

१) आजऱ्यात रंगांची उधळण करीत रंगपंचमी साजरी करताना महिला.