आॅनलाईन लोकमत
कोल्हापूर, दि. ६ शहरातील अवैध प्रवासी वाहतुकीस आळ घालण्यासाठी चार फिरती पथके तयार करण्यात आली असून आज, शुक्रवारपासून प्रत्यक्ष कारवाईला प्रारंभ होईल, असे आश्वासन प्रादेशिक परिवहन अधिकारी डी.टी.पवार यांनी गुरुवारी महानगरपालिकेच्या शिष्टमंडळाला दिले. अवैध वाहतुक करणारी वाहने जप्त करण्यात येतील असेही त्यांनी यावेळी सांगितले.
जर येत्या पंधरा दिवसात अवैध प्रवासी वाहतुक रोखली नाही, तर मात्र आम्ही स्वत: रस्त्यांवर उतरुन कारवाई करु, असा इशारा महानगरपालिकेच्या पदाधिकारी, नगरसेवकांनी दिला. कोल्हापूर शहरात गेल्या काही महिन्यापासून अवैध प्रवासी वाहतुक मोठ्या प्रमाणात सुरु आहे. तसेच शहर हद्दीत परवाना नसतानाही सहा आसनी रिक्षा वाहतुक सुरु आहे. त्यामुळे या दोन्ही अवैध प्रवासी वाहतुकीवर तातडीने कारवाई करावी आणि केएमटी वाचवावी अशी मागणी करण्यासाठी महानगरपालिकेचे उपमहापौर अर्जुन माने, स्थायी सभापती संदीप नेजदार, परिवहन सभापती नियाज खान, विरोधी पक्षनेता किरण शिराळे, गटनेता शारंगधर देशमुख, सत्यजित कदम, नगरसेवक तौफीक मुल्लाणी,विजय खाडे, अभिजित चव्हाण, अशोक जाधव, प्रताप जाधव, सूरजंजिरी लाटकर, उमा बनसोडे, शोभा कवाळे, माधूरी लाड, प्रभारी अतिरीक्त वाहतुक व्यवस्थापक संजय भोसले यांच्यासह कर्मचाऱ्यांच्या शिष्टमंडळाने डी. टी. पवार यांची भेट घेतली.
यावेळी स्वाभिमानी रिक्षा चालक मालक संघटनेचे कार्यकर्तेही सहभागी झाले होते. तीन केएमटी बसमधून हे सर्व जण प्रादेशिक परिवहन अधिकाऱ्यांच्या कार्यालयाजवळ पोहचले. ‘हटाव हटाव - वडाप हटाव’, ‘वडाप हटाव, केएमटी बचाव’ अशा घोषणा देतच सर्वजण डी. टी. पवार यांच्या कार्यालयात गेले. त्यावेळी पवार हे त्यांच्या सहकारी अधिकाऱ्यांशी चर्चा करत बसले होते.
परिवहन सभापती खान, सत्यजित कदम, शारंगधर देशमुख, अशोक जाधव, सूमंजिरी लाटकर यांनी शिष्टमंडळ घेऊन येण्याचे कारण सांगितले. शहरात अवैध रिक्षा वाहतुक सुरु असल्याने केएमटी आर्थिक अडचणीत सापडली आहे. हजारो कर्मचाऱ्यांच्या रोजीरोटीचा प्रश्न निर्माण होत आहे. हजारो बेकायदेशीर रिक्षा शहरात फिरत असल्याने वाहतुकीची कोंडी होत आहे. प्रदुषण वाढत आहे. त्यामुळे या अवैध प्रवासी वाहतुकीवर कायदेशीर कारवाई करावी अशी मागणी त्यांनी यावेळी केली.
अडचणी येऊ नयेत : पवार
कारवाई करताना काय अडचणी येतात याचा अनुभव आम्हाला आहे. त्यामुळे कारवाई सुरु झाली की पुन्हा अशा अडचणी येऊ नयेत अशी अपेक्षा डी. टी.पवार यांनी व्यक्त केली. आम्ही अशा वडाप रिक्षा वाहतुकीला आळा घालण्याकरीता चार पथके तयार केली असून शुक्रवारपासून ही कारवाई सुरु होईल. एक पथक कायमस्वरुपी तैनात केले जाईल. सहा आसनी रिक्षा तसेच आयुष्य संपलेल्या रिक्षा जप्त केल्या जातील, तसेच प्रत्येक आठवड्याला आढावा बैठक घेतली जाईल, असेही पवार यांनी सांगितले.
फोनवर दम देतात ...
प्रादेशिक परिवहन अधिकारी पवार यांनी शिष्टमंडळासोबत चर्चा करताना ‘आम्ही कारवाई सुरु केली की लगेच फोनवर दम दिला जातो. कारवाईत व्यत्यय आणला जातो. असा अनुभव येणार नाही याची दक्षता आपण सर्वजणांनी घ्यावी’, अशी विनंती केली. आम्ही अवैध प्रवासी वाहतुकीला कधीही पाठीशी घातले नाही, पण फोनवर दम दिल्याने त्यात खंड पडतो, अशी कबुलीही त्यांनी दिली. त्याचवेळी त्यांना रोखत शारंगधर देशमुख यांनी त्यांना अशा कारवाईत आम्ही हस्तक्षेप करणार नाही, उलट आम्ही तुमच्या सोबतच राहू, असे सांगितले. पंधरा दिवसांची मुदत शहरातील वडाप वाहतुक बंद करण्यासाठी नगरसेवकांनी पंधरा दिवसांची मुदत दिली आहे. जर या पंधरा दिवसात वडाप पूर्णपणे बंद झाले नाही तर मात्र आम्ही सर्व नगररसेवक, केएमटीचे कर्मचारी रस्त्यावर उतरुन स्वत: कारवाई करणार असा इशारा यावेळी देण्यात आला.