गडहिंग्लजमध्ये बाहेरील नागरिकांना मंगळवारअखेर प्रवेश बंद

गडहिंग्लज :

कडक लॉकडाऊन संपल्यानंतर गर्दी टाळण्यासाठी सोमवार (दि. २४) व मंगळवार (दि. २५) या दोन्ही दिवशी बाहेरून येणाऱ्या नागरिकांना गडहिंग्लज शहरात प्रवेश न देण्याचा निर्णय पालिका व पोलीस प्रशासनाच्या संयुक्त बैठकीत रविवारी (दि. २२) घेण्यात आला.

जिल्हा प्रशासनाच्या लॉकडाऊनची मुदत संपल्यानंतर बाजारहाट व अन्य कारणांसाठी आजूबाजूच्या खेड्यांतील नागरिकांमुळे गडहिंग्लज शहरात होणाऱ्या संभाव्य गर्दीच्या नियंत्रणासाठी ही बैठक झाली. यावेळी उपनगराध्यक्ष महेश कोरी, पोलीस उपअधीक्षक गणेश इंगळे, पोलीस निरीक्षक प्रकाश गायकवाड, मुख्याधिकारी नागेंद्र मुतकेकर यांची प्रमुख उपस्थिती होती.

प्रारंभी मुख्याधिकारी मुतकेकर यांनी शहरातील कोरोनाचा संसर्ग रोखण्यासाठी पालिकेने केलेल्या उपाययोजनांची माहिती दिली. उपनगराध्यक्ष कोरी यांनी प्रत्यक्षात उद्भवणाऱ्या समस्या व त्यासंदर्भातील उपाययोजनाही सुचविल्या.

पोलीस उपअधीक्षक इंगळे म्हणाले, नागरिकांनी पूर्वीप्रमाणेच यापुढे सहकार्य करावे, कोणावरही अनावश्यक कारवाई करण्याची वेळ येऊ नये.

बैठकीत विरोधी पक्षनेते हारुण सय्यद, नगरसेवक दीपक कुराडे, प्रकाश मोरे, शुभदा पाटील, शकुंतला हातरोटे, सुनीता पाटील, नितीन देसाई, नरेंद्र भद्रापूर, वीणा कापसे आदींसह खातेप्रमुख व कर्मचारी उपस्थित होते.

नागरिकांना सूचना

नागरिकांनी आपल्या प्रभागातील मेडिकल, किराणा दुकाने व भाजीपाला विक्री केंद्रे याच ठिकाणी खरेदी करावी. लसीकरण केंद्रावर अनावश्यक गर्दी करू नये, सौम्य लक्षणाच्या रुग्णांना कोविड काळजी केंद्र किंवा संस्थात्मक अलगीकरणातच ठेवावे.

-

* फोटो ओळी : गडहिंग्लज नगरपालिकेच्या शाहू सभागृहात आयोजित संयुक्त बैठकीत मुख्याधिकारी नागेंद्र मुतकेकर यांनी मार्गदर्शन केले. यावेळी उपनगराध्यक्ष महेश कोरी, पोलीस उपअधीक्षक गणेश इंगळे, पोलीस निरीक्षक प्रकाश गायकवाड उपस्थित होते.

क्रमांक : २३०५२०२१-गड-०९