अल्पवयीन मुलीवर अत्याचार, आरोपीस आजीवन कारावास

लोकमत न्यूज नेटवर्क

पेठवडगाव : अल्पवयीन मुलीवर लैंगिक अत्याचार केल्याप्रकरणी फरसाण कंपनीतील मॅनेजरला आजीवन कारावास व दहा हजार रुपये दंडाची शिक्षा सुनावली. विशेष जिल्हा व सत्र न्यायाधीश ए. एस. महात्मे यांच्या न्यायालयाने निकाल दिला.

राजीवकुमारसिंग हरिश शंकरसिंग (वय ३०, रा. हिस्सामुद्दीनपूर, ता. रानीपूर, उत्तर प्रदेश) असे शिक्षा झालेल्या आरोपीचे नाव आहे. याबाबत फिर्याद पीडितेच्या आईने पोलिसात दिली होती. याप्रकरणी पोलीस निरीक्षक धनंजय जाधव व त्यांच्या पथकाने कसून तपास करत मोबाईलच्या लोकेशनवरून आरोपीस पकडले होते.

खटल्याची पार्श्‍वभूमी अशी की, राजीवकुमार सिंग हा २०१६ मध्ये फरसाण कारखान्यामध्ये मॅनेजर होता. तसेच पीडित मुलगीही येथे नोकरीला होती. तिच्याशी लगट करण्याचा प्रयत्न त्याने केला. तसेच खोलीत बोलावून तिच्यावर अत्याचार केले.

त्यानंतर आरोपी गुजरातमधील सुरतमध्ये वाॅचमनची नोकरी करत होता. तेथे तो १९ दिवस होता. दरम्यान, पीडितेच्या आईने वडगाव पोलिसात तक्रार दिली होती. पोलिसांनी टेक्निकल तपास करून दोघांना ताब्यात घेतले होते.

खटल्याचे कामकाज विशेष जिल्हा व सत्र न्यायाधीश यांच्यासमोर सुरू होते. विशेष सरकारी वकील अमिता. ए. कुलकर्णी यांनी १२ साक्षीदार तपासले. यामध्ये पीडित मुलगीसह अन्य साक्षीदार यांच्या साक्षी महत्त्वपूर्ण ठरल्या. युक्तिवादानंतर न्यायालयाने राजीवकुमार सिंगला विविध कलमांनुसार एकत्रित आजीवन कारावास व दहा हजार रुपये दंडाची शिक्षा सुनावली. सरकार पक्षाला भारत शिंदे, महेंद्र चव्हाण, तत्कालीन तपास अधिकारी, पोलीस निरीक्षक धनंजय जाधव, दत्तात्रय कौलवकर, मिलिंद टेळी यांचे सहकार्य लाभले.

फोटो : २० राजीवकुमार सिंग आरोपी

फोटो : २० धनंजय जाधव, पीआय