आबिटकर गटाचा विरोधी आघाडीला पाठिंबा

लोकमत न्यूज नेटवर्क,

गारगोटी :

शेतकऱ्यांच्या दुधाला प्रति लिटर दोन रुपये वाढ देण्यासाठी आणि ‘गोकुळ’मधील सहकार मोडीत काढण्याचा घाट घातलेल्या मल्टिस्टेटला विरोध करण्यासाठी चाललेल्या लढाईत आमदार प्रकाश आबिटकर गटाने शाहू आघाडीला दिलेल्या पाठिंब्यामुळे विजयाचे वर्तुळ पूर्ण झाले आहे. आबिटकर गटाच्या कार्यकर्त्यांनी घेतलेल्या या निर्णयामुळे विरोधी राजर्षी शाहू आघाडीला आणखी बळकटी मिळाली असल्याचा विश्वास पालकमंत्री सतेज पाटील यांनी व्यक्त केला. गारगोटी येथे आमदार आबिटकर यांच्या गटाने आयोजित केलेल्या प्रमुख कार्यकर्त्यांच्या पाठिंबा बैठकीत ते बोलत होते. प्रमुख उपस्थितीत खासदार संजय मंडलिक, विश्वासराव पाटील, मारुतराव जाधव होते. गोकुळ दूध संघाच्या निवडणुकीत आमदार प्रकाश आबिटकर यांनी विरोधी राजर्षी शाहू आघाडीला पाठिंबा देण्याचा निर्णय या बैठकीत जाहीर केला.

प्रारंभी ज्येष्ठ नेते मारुतराव जाधव यांनी प्रास्ताविकात भ्रष्ट सत्ताधाऱ्यांना बाजूला करून स्वाभिमानी दूध उत्पादकांची सत्ता आणण्यासाठी राजर्षी शाहू आघाडीच्या प्रयत्नाला बळ देण्यासाठी आपण सर्वांनी या आघाडीच्या पाठीमागे उभे राहावे, अशी भूमिका मांडली.

आमदार प्रकाश आबिटकर यांनी गोकुळ निवडणुकीबाबतची आपली भूमिका स्पष्ट करताना, राधानगरी विधानसभा मतदारसंघातील सर्व प्रमुख कार्यकर्ते व ठरावधारक यांनी एकसंध राहण्याची भूमिका घेतली. निर्णयाला थोडा उशीर झाला असला तरी स्वाभिमानी दूध उत्पादकांच्या न्याय हक्कासाठी नेहमीच महाविकास आघाडीसोबत राहण्याची आमची भूमिका राहिलेली आहे. गेल्या ५ वर्षांपूर्वी मल्टीस्टेटला विरोध करून हा संघ सर्वसामान्य दूध उत्पादकांच्या ताब्यात राहावा यासाठी पालकमंत्री सतेज पाटील, खासदार संजय मंडलिक यांनी पुढाकार घेऊन केलेल्या प्रयत्नामुळेच आज आपणास मतदानाचा हक्क प्राप्त झाला आहे. यावेळचे मत आपले हक्क शाबूत ठेवणाऱ्या पालकमंत्री सतेज पाटील यांच्यासाठी द्यावयाचे आहे असे सांगून या आघाडीसोबत राहण्याचे जाहीर केले.

खासदार मंडलिक म्हणाले, गेल्या दहा दिवसांपासून आमदार आबिटकर यांच्या निर्णयाकडे जिल्ह्याचे लक्ष लागले होते, पण त्यांचा निर्णय आपल्याबरोबरच असेल याची मला खात्री होती. आमदार आबिटकर यांच्या निर्णयामुळे ‘गोकुळ’च्या निवडणुकीत राजर्षी शाहू आघाडीचाच विजय होईल यात शंका नाही. आपण सर्वांनी मिळून यासाठी प्रयत्नशील राहूया, असे आवाहन केले.

यावेळी ज्येष्ठ नेते बी. एस. देसाई, ‘गोकुळ’चे माजी चेअरमन विश्वास पाटील, के. जी. नांदेकर, नंदकुमार ढेंगे, विश्वनाथ पाटील, शामराव भावके, दत्तात्रय उगले, कल्याणराव निकम, अरुण जाधव, अभिजित तायशेटे, नंदकुमार सूर्यवंशी, जितेंद्र टोपले, अशोक फराकटे, पांडुरंग पाटील, प्रकाश पाटील, अजित देसाई, अशोक वारके, विलास पाटील, सभापती कीर्ती देसाई, उपसभापती सुनील निंबाळकर, सरपंच धनाजी खोत, बी. डी.भोपळे, आदी प्रमुख कार्यकर्ते, ठरावधारक उपस्थित होते.

फोटो ओळ

राजर्षी शाहू आघाडीला पाठिंबा दिल्याबद्दल पालकमंत्री सतेज पाटील हे आमदार आबिटकर यांचा सत्कार करताना. सोबत खासदार मंडलिक, मारुतराव जाधव, बी. एस. देसाई, विश्वास पाटील, नंदकुमार ढेंगे, अभिजित तायशेट्टी, प्रकाश पाटील,धनाजी खोत आदी.

जाधव गुरुजीची कोपरखळी

चौकट

दरवर्षी हुंडा देणारे सासरे

वर्षाला चार-चार कोटी हुंडा आपल्या जावयांना मिळवून देण्यासाठी नरके आणि महाडिक यांनी पुण्यात कोल्ड स्टोअरेजचा ठेका जावयांच्या कंपनीला दिला आहे. संपूर्ण वर्षाचा खर्च साडेतीन कोटी रुपये अपेक्षित असताना वार्षिक अकरा कोटी रुपयांपेक्षा अधिक खर्च ताळेबंदमध्ये दाखवला जातो.