नगररचना विभागाकडून ४१ भोगवटा प्रमाणपत्रे निकाली

कोल्हापूर : महानगरपालिका नगररचना विभागाच्यावतीने गुरुवारी आयोजित केलेल्या विशेष शिबिरात विकास परवानगी कामांच्या भोगवटा प्रमाणपत्रावर प्रशासकीय मंजुरीची कार्यवाही तत्काळ होण्यासाठी गुरुवारी झालेल्या विशेष कॅम्पमध्ये ४१ फाईल्स निर्गत करून भोगवटा प्रमाणपत्रे देण्यात आली.

या शिबिरात गुरुवारी एकूण ५४ अर्ज दाखल झाले होते. यापैकी चार प्रकरणातील कागदपत्रे अपुरी असल्याने निकाली काढण्यात आली, तर नऊ प्रकरणे प्रलंबित आहेत. या विशेष कॅम्पचे बागल मार्केट राजारामपुरी येथील नगररचना विभागात आयोजन करण्यात आले होते.

दि. ५ मे पूर्वी ऑफलाईन पद्धतीने नगररचना विभागाकडे जी प्रकरणे सादर झाली होती, अशा प्रकरणांची भोगवट्याची कामे जलद गतीने होण्यासाठी प्रशासक डॉ. कादंबरी बलकवडे यांनी नगररचना विभागामध्ये विशेष कॅम्प आयोजित करण्याचे आदेश दिले होते. या अनुषंगाने नगररचना विभागामार्फत गुरुवारी व आज, शुक्रवारी शिबिराचे आयोजन केले आहे.

यावेळी सहायक संचालक नगररचना रामचंद्र महाजन, उपशहर रचनाकार रमेश मस्कर, सर्व कनिष्ठ अभियंता, सर्वेअर उपस्थित होते.