अटकेतील ठकसेनाकडून औषध विक्रेत्यास १८ लाखाला गंडा

कोल्हापूर : हैदराबाद येथून अटक केलेल्या ठकसेनाने आणखी एकास १८ लाखाला गंडा घातल्याची तक्रार लक्ष्मीपुरी पोलिसांत नोंद झाली. मीर सरफराज अली (वय ४९, रा. चारमिनार, हैदराबाद, राज्य तेलंगणा) असे ठकसेनाचे नाव आहे. सोन्याच्या व्यवहारात पैसे गुंतवा, मोठ्या रकमेचा परतावा देतो, असे आमिष दाखवून त्याने अनेकांना लाखो रुपयांचा गंडा घातल्याचे उघड होत आहे.

लॉकडाऊनमध्ये पूनम संजय अतिग्रे (रा. मंगळवार पेठ) यांच्या मुलाला नोकरी लावण्यासाठी त्यांच्याकडून मीर सरफराज अली याने १२ लाख रुपये घेतले. त्यांना गोल्ड लोनचे आमिष दाखवून त्यांचे सोने बॅंकेत गहाण ठेवून लोनची रक्कम परस्पर हडप केली. अतिग्रे यांनी जुना राजवाडा पोलिसांत फसवणुकीची तक्रार दिली होती. त्याने सुधीर कानडे व रामचंद्र म्हेत्तर, विशाल संकपाळ, मोहन चाचे यांनाही लाखो रुपयांचा गंडा घातल्याचे चौकशीत पुढे आले. तो सात महिने फरार होता. त्याला पोलिसांनी मंगळवारी (दि. ७) हैदराबाद येेथे अटक केली. सद्या तो पोलीस कोठडीत आहे.

दरम्यान, त्या ठकसेनाने शहरातील छत्रपती शिवाजी महाराज चौकातील किसन तातोबा खंदारे (५२, रा. नागाळा पार्क) याही औषध दुकानदारास १८ लाखाला गंडा घातल्याची तक्रार शुक्रवारी सायंकाळी दाखल झाली. सोन्याच्या गुंतवणुकीवर जादा परतावा देण्याचे त्याने आमिष दाखविले होते.