भय इथले संपत नाही..! जीवन-मृत्यूतील अंतर ५ फूट; वेगात जाणाऱ्या दोन ट्रेनच्या दारात लटकलेले प्रवासी एकमेकांत अडकून पडले

४ ठार, ९ जखमी, दोघे गंभीर; मृतांत लाेहमार्ग पोलिस ठाण्याच्या जवानाचा समावेश; मृतांच्या वारसांना ५ लाखांची मदत

अनिकेत घमंडी

डोंबिवली : मुंबईवरून कर्जतकडे आणि कसाऱ्याहून मुंबईकडे जाणाऱ्या जलद लोकल ट्रेनच्या दरवाजात लटकणारे प्रवासी परस्परांना धडकल्याने सोमवारी सकाळी मुंब्र्यात झालेल्या भीषण अपघातात ४ प्रवाशांचा मृत्यू झाला, तर ९ जखमी झाले. काहींची प्रकृती चिंताजनक आहे. मृतांमध्ये ठाणे लोहमार्ग पोलिस ठाण्याचे कर्मचारी विकी मुख्यदल यांचा समावेश आहे. मृतांच्या वारसांना राज्य सरकारकडून प्रत्येकी ५ लाख रुपयांची मदत देण्यात येणार असल्याचे मुख्यमंत्री देवेंद्र फडणवीस यांनी जाहीर केले.

मुंब्रा स्थानकापाशी जलद मार्गिकांमधील अंतर कमी आहे. सकाळच्या गर्दीमुळे आत शिरण्यास जागाच नसल्याने दोन्ही लोकलच्या दरवाजात प्रवासी लटकत होते. त्यांच्या पाठीवरील बॅगांचा परस्परांना धक्का लागल्यामुळे हा अपघात घडला, असे प्रत्यक्षदर्शींनी सांगितले. बराच वेळ काय झाले हे कोणालाच समजत नव्हते. काहींना गंभीर जखमा झाल्याने ते रक्तबंबाळ झाले, तर काहींना मुका मार लागल्याने त्यांची अवस्था शरीराची हालचाल करण्या पलिकडे होती. अनेक प्रवासी रुळाजवळच्या  खडीमध्ये पडले होते. असंवेदनशील रेल्वे प्रशासनाने मात्र आपली जबाबदारी झटकत दरवाजातून प्रवास करणाऱ्यांवर खापर फोडले.

जलद मार्गिकेवर ही दुर्घटना घडण्याच्या काही मिनिटे आधी पुष्पक एक्स्प्रेस कल्याणकडे रवाना झाली. त्यामुळे सुरुवातीला त्या एक्स्प्रेसमधील प्रवासी पडल्याची भीती व्यक्त झाली होती. जखमींना ५० हजार ते २ लाख रूपयांची मदत देऊ. उपचाराचा पूर्ण खर्च  सरकार करेल, असे आपत्ती व्यवस्थापन मंत्री गिरीश महाजन यांनी सांगितले.

दोन ट्रॅकमध्ये अंतर किती?

वरिष्ठ अधिकाऱ्यांनी सांगितल्यानुसार दोन्ही ट्रॅकमधील अंतर ट्रॅकच्या मध्यापासून ५.३ मीटर असते, तर ट्रॅकच्या दोन्ही समोरासमोरील बाजूंपासून ३.६ मीटर एवढे असते.  लोकल एकमेकांना क्रॉस करताना सुमारे १.८ मीटर म्हणजे ५ ते ६ फूट अंतर असते. हे अंतर वळणदार भागात देखील तेवढेच असते.

अपघात स्थळी रुळांमधील नेमके अंतर किती? : रुळांमधील अंतर नेमके किती होते, याचा तपास रेल्वे प्रशासनाकडून सुरू करण्यात आला आहे. त्याचे फोटो समाजमाध्यमांवर व्हायरल झाले आहेत.

जखमी प्रवासी...

आदेश भोईर (२६, रा. आटगाव, कसारा), रिहान शेख (२६, भिवंडी), तुषार भगत (२२), मनीष सरोज (२६ दिवा साबेगाव, दिवा), मच्छिंद्र गोतारणे (३९, वाशिंद), स्नेहा धोंडे (२१, रा. टिटवाळा), प्रियंका भाटिया (२६ रा. शहाड, कल्याण) या सात जणांची प्रकृती स्थिर आहे. त्यांच्यावर शिवाजी महाराज रुग्णालयात उपचार सुरू आहेत.

चिंताजनक : शिवा गवळी (२३), अनिल मोरे (४०).