ठाणे : भाजप आमदार गणपत गायकवाड यांनी हिललाइन पोलिस ठाण्यातच केलेल्या गोळीबारात शिवसेना शिंदे गटाचे कल्याण शहरप्रमुख महेश गायकवाड आणि राहुल पाटील हे दोघे गंभीर जखमी झाले होते. त्यांच्यावर ठाण्यातील ज्युपिटर रुग्णालयात अतिदक्षता विभागात उपचार सुरू होते.
गायकवाड यांची प्रकृती आता धोक्याबाहेर असून त्यांना जनरल वॉर्डमध्ये शिफ्ट केल्याची माहिती सूत्रांनी दिली. गायकवाड यांना आधी व्हेंटिलेटरवर ठेवले होते. तीन दिवसांपूर्वी व्हेंटिलेटरवरून त्यांना काढण्यात आले. पाठोपाठ नुकतेच त्यांना अतिदक्षता विभागातून सामान्य वॉर्डमध्ये शिफ्ट केले आहे.
गायकवाड कुटुंबाचे मौन कायम
आमदार पुत्र वैभव गायकवाड, नागेश बेडेकर फरार असून गायकवाड कुटुंबातील सदस्यांनी गोळीबार प्रकरणी प्रतिक्रिया दिलेली नाही. आमदार पुत्र वैभव गायकवाड व नागेश बेडेकर अद्याप फरार आहेत. एक ते दोन दिवसात ते हजर होणार असल्याचे बोलले जात आहे. रणजितला सीसीटीव्ही फुटेजवरून अटक करण्यात आली असून अनेक जण पोलिसांच्या रडारवर आहेत. या प्रकरणाची अद्याप चाैकशी सुरू या प्रकरणात आणखी काही जणांना अटक हाेण्याची शक्यता वर्तवली जात आहे.
आ. गायकवाड यांच्या खासगी चालकाला अटक
हिललाइन पोलिस ठाण्यात झालेल्या गोळीबार प्रकरणी भिवंडी गुन्हे शाखेने आमदार गायकवाड यांचा खासगी चालक रणजित यादव याला अटक केली. उल्हासनगर न्यायालयाने त्याला १४ फेब्रुवारीपर्यंत पोलिस कोठडी सुनावली. वरिष्ठ पोलिस निरीक्षकाच्या केबिनमध्ये आमदार गणपत गायकवाड यांनी शिवसेना शिंदे गटाचे कल्याण पूर्वचे शहरप्रमुख महेश गायकवाड, राहुल पाटील यांच्यावर गोळीबार केला. याप्रकरणी आमदार गायकवाड, वैभव गायकवाड, हर्षल केणी, संदीप सरवणकर, नागेश बेडेकर, विकी गणोत्रा यांच्यासह इतरांवर गुन्हे दाखल झाले. सुरुवातीला पोलिसांनी आमदार गायकवाड, सरवणकर व हर्षल केणी या तिघांना अटक केली. त्यानंतर तपासादरम्यान विकी तर शनिवारी भिवंडी क्राईम ब्रँचने आमदार गायकवाड यांचा खासगी चालक रणजित याला अटक करण्यात आली आहे.