प्रेमाचे दोन क्षण एकमेकांसोबत घालवण्यासाठी आणि गप्पांसाठी डेटवर जाणं प्रत्येक कपलला आवडतं. त्यात डेटवर जाणं आणि आपल्या बॉयफ्रेंडनं आपल्यासाठी काहीतरी खास प्लान करणं, सरप्राइज देणं याची प्रत्ये गर्लफ्रेंडला आतुरता असते. जर स्पेशल डेट असेल तर मग अगदी हॉटेल शोधण्यापासून ते कपडे कोणते घालायचे, हॉटेलचा मेन्यू काय आहे ते अगदी जागा रिझर्व्ह करण्यापर्यंतचं प्लानिंक कपल करत असतात. पण कॅलिफोर्नियात एका कपलची एक हटके कहाणी समोर आली आहे.
आपला बॉयफ्रेंड आपल्याला रोमँटिक डेटवर घेऊन जातोय हे कळाल्यावर गर्लफ्रेंडनं अगदी कोणते कपडे घालायचे याच्या तयारीपासून ते सगळं अगदी टापटीप होईल याची काळजी घेत तयारी केली. बॉयफ्रेंडच्या आवडीचं सारंकाही तिनं केलं. पण डेटवर तिच्यासोबत जे घडलं ते पाहून तिला चक्क कपाळावर हात मारायची वेळ आली. कॅलिफोर्नियात राहणाऱ्या हैदी बर्बर नावाच्या मुलीसोबत हा प्रसंग घडला आहे. तिनं आपल्या सोशल मीडिया अकाऊंटवर घडलेल्या घटनेची माहिती दिली आहे.
हैदी हिनं तिच्या टिकटॉक अकाऊंटवर एक व्हिडिओ शेअर करत तिच्यासोबत घडलेला प्रसंग सांगितला आणि जे घडलं ते चुकीचं होतं की बरोबर असा सल्ला तिनं आपल्या फॉलोअर्सला विचारला. मग काय तिच्या व्हिडिओवर जोरदार कमेंट्स येण्यास सुरुवात झाली आणि व्हिडिओ तुफान व्हायरल झाला. तिच्या व्हिडिओला आतापर्यंत ३४ लाख व्ह्यूज मिळाले आहेत.
नेमकं काय घडलं?हैदी तिच्या बॉयफ्रेंडसोबत डेटवर गेली होती. ती आणि तिचा बॉयफ्रेंड एका हॉटेलमध्ये गेले आणि ठरलेल्या टेबलवर बसले देखील. पण जेव्हा ऑर्डर द्यायची वेळ आली तेव्हा तिच्या बॉयफ्रेंडनं फक्त त्याच्यासाठी खाण्याची ऑर्डर वेटरला दिली आणि हैदीला विचारलं देखील नाही. बॉयफ्रेंडच्या या कृतीनं हैदी त्याच्याकडे पाहातच राहिली. क्षणभर नेमकं तिच्यासोबत काय घडलं हेच तिला कळालं नाही. ज्या व्यक्तीसोबत आपण डेटवर आलो आहोत. त्याच्यासाठी एवढी तयारी केली आहे आणि त्यानं आपला विचारच करु नये? हे तिला खूप विचित्र वाटलं. हैदीनं डेटनंतर संपूर्ण प्रसंग व्हिडिओच्या माध्यमातून तिच्या फॉलोअर्स आणि फ्रेंड्सना सांगितला.
"मी माझ्या आयुष्यात पहिल्यांदा एका मुलासोबत डेटवर गेले होते आणि त्यादिवशी माझ्याकडे काहीच पैसे नव्हते. त्यात त्यानं फक्त स्वत:साठी ऑर्डर दिली आणि मला विचारलं देखील नाही. त्याचं हे असं वागणं मला खूप आश्चर्यचकीत करणारं ठरलं. अशा मुलासोबत मी पुन्हा डेटवर जायला हवं की नको?", असा सवाल हैदीनं सोशल मीडियावर तिच्या फॉलोअर्सला विचारला. त्यावर युजर्सच्या वेगवेगळ्या प्रतिक्रिया येऊ लागल्या आहेत. अनेकांनी बॉयफ्रेंडनं केलेल्या कृतीला चुकीचं ठरवलं आहे. तर काहींनी बॉयफ्रेंडकडून बिल भरलं जाईल किंवा ऑर्डर केली जाईल अशी अपेक्षाच का ठेवायची? आपण आपली ऑर्डर देऊ शकत नाही का?, असंही म्हटलं आहे. तर एकानं संबंधित मुलासोबत याआधी बिल देण्यावरुन काहीतरी प्रसंग घडला असेल आणि त्यातून त्याला चांगलाच धडा मिळाला असेल म्हणून त्यानं असं केलं असेल, असंही हैदीला सुचवलं आहे.