प्रेमाला वयाचं बंधन नसतं असं म्हणतात. कोण, कधी, कसं, कोणाच्या प्रेमात पडेल हे सांगता येत नाही. अशीच एक अजब प्रेमाची गजब गोष्ट आता समोर आली आहे. 19 वर्षांचा तरुण 56 वर्षांच्या महिलेच्या प्रेमात वेडा झाल्याची घटना घडली आहे. थायलंडमध्ये ही प्यारवाली लव्हस्टोरी पाहायला मिळाली. या दोघांमध्ये प्रेम इतकं वाढलं की त्यांनी थेट लग्नच करण्याचा निर्णय घेतला. त्यांचा आता साखरपुडा देखील झाला आहे. यांचे काही फोटो हे सोशल मीडियावर जोरदार व्हायरल होत आहेत.
मुलगा आणि महिला यांच्या वयात तब्बल 37 वर्षांचं अंतर असल्याचं पाहायला मिळत आहे. द मिररच्या रिपोर्टनुसार, जेव्हा मुलगा 10 वर्षांचा होता तेव्हा त्यांची ओळख झाली. 56 वर्षीय महिलेचं नाव जनला नामुआंगराक आहे तर 19 वर्षीय मुलाचं नाव वुथिचाई चंताराज आहे. हे दोघे एकमेकांच्या शेजारी राहत होते. जनला घटस्फोटित असून, ती एकटीच राहत होती. त्यामुळे घरातल्या कामात मदत करण्यासाठी ती वुथिचाईला घरी बोलावत असे. घरकामात मदत करताना दोघांची चांगली मैत्री झाली.
रिलेशनशिपला दोन वर्षं झाली आहेत. ते शहरातल्या प्रसिद्ध ठिकाणी आणि रेस्टॉरंटमध्ये डेटवर जात असतात. या जोडप्याने सांगितलं, की वयातल्या 37 वर्षांच्या अंतराने त्यांना काहीही फरक पडत नाही. सार्वजनिक ठिकाणी किस करताना आणि हात धरतानाही दोघांनाही अवघडल्यासारखं वाटत नाही. रिलेशनशिपबद्दल बोलताना वुथिचाईने मी जनलासोबत 2 वर्षांपासून आहे. माझ्या आयुष्यातली ही पहिलीच वेळ आहे, की मला कोणाचं तरी जीवन सुखकर करावसं वाटत आहे. ती खूप मेहनती आणि प्रामाणिक आहे. मला ती खूप आवडते असं म्हटलं आहे.
जनला घटस्फोटित आहे. तिला तीन मुलं आहेत. जनलाच्या मुलांचं वय 30 वर्षांच्या आसपास आहे. मात्र आता जनला वुथिचाईशी दुसरं लग्न करण्याचा विचार करत आहे. जनला म्हणाली की, "वुथिचाई माझ्यासाठी सुपरहिरोसारखा आहे. तो मला रोज मदत करतो. तो मोठा झाल्यावर आमच्यात फीलिंग्ज निर्माण झाल्या. वुथिचाई मला तरुण असल्यासारखं फील करायला लावतो. आम्ही आनंदी आहोत." एका हिंदी वेबसाईटने य़ाबाबतचे वृत्त दिले आहे.