पुण्यात तशी भरपूर पर्यटन स्थळं आहेत. तुम्ही कूटुंबासोबत, मित्र-मैत्रिणींसोबत तिथे जाऊ शकतो. पण म्हणतात, पुणे तिथे काय उणे? याच पुण्यात काही रोमान्स पॉईंटपण आहेत. आपली सुट्टी किंवा विकेंड पुण्यात व्यतीत करण्यासाठी तुम्हाला या ठिकाणांची माहिती असलेली बरी.
एम्प्रेस गार्डन
पुण्यातील रेस कोर्सच्या बाजूला हे एम्प्रेस गार्डन आहे. सुंदर फळा-फुलांच्या झाडांच्या सानिध्यात ही बाग असल्याने अनेक प्रेमीयुगूलांना येथे यायला आवडतं. विविध झाडांनी संपन्न या बागेत अगदी शांत व प्रसन्न वाटतं.
पर्वती हिल
पर्वती हिलच्या सौंदर्याविषयी तुम्हाला नव्याने काही सांगण्याची गरज नाही. समुद्र तळापासून २१०० फुट उंचावर असणाऱ्या या पर्वतीवरुन पुण्यातील काही भाग दिसतो. पेशवांच्या एका वंशाने बांधलेलं एक जुनं मंदिरही तिथे अस्तित्वात आहे. थंड वाऱ्याची झुळुक येथे सतत सुरु असल्याने छान रोमँटिक मूड येथे जाणवत राहतो.
खडकवासला धरण
पुण्यातील २० किलोमीटर परिसरात असलेल्या खडकवासला धरणाजवळ अनेकजण येतात. शहरातल्या गडबडीच्या युगातून थोडंसं शांत होण्यासाठी येथे अनेक प्रेमीयुगुल येतात.
ओशो गार्डन
कोरेगाव पार्कमध्ये वसलेलं हे ओशो गार्डन विविध नैसर्गिक सौंदर्याने नटलेले आहे. पुण्यातील सर्वात सुंदर आणि शांत म्हणून या गार्डनची ओळख आहे. शहरात वसेलेलं हे गार्डन आपल्याला एका वेगळ्या जगात घेऊन जातं. त्यामुळे प्रेमीयुगूलं इकडे अवश्य भेट देतात.
बुंद गार्डन
पुणे रेल्वे स्थानकापासून अगदी २ किलोमीटर अंतरावर असणाऱ्या बुंद गार्डनला महात्मा गांधी गार्डन म्हणूनही ओळखलं जातं. शिवाय येथे बोटीवरुनही सफारी करता येते. बगिचा आणि तलाव या सुविधांचा मिलाफ येथे असल्याने आणि स्थानकापासून जवळ असल्याने मुंबई शहरातूनही अनेक प्रेमीयूगुल येथे येत असतात. तसेच मनोरंजनासाठी अनेक साधनंही येथे उपलब्ध आहेत.
मुळशी नदी
कित्येक प्रेमीयुगुलांना नदी किनारी बसून एकमेंकासोबत वेळ व्यतीत करण्याची इच्छा असते. त्यासाठी मुळशी नदी एक सुंदर उदाहरण आहे. सह्याद्री पर्वतांमधून वाहणारी ही शांत नदी तिच्या आजूबाजूच्या परिसरातही शांतता पसरवत वाहते. त्यामुळे निसर्ग सौंदर्याने वेढलेल्या या रोमँटिक जागेला एकदा नक्की भेट द्या. तसेच येथे नौकाविहारही करता येतं.
ओकयाम फ्रेंडशिप गार्डन
पु.ल. देशपांडे उद्यान या नावानेही या गार्डनला ओळखलं जातं. जपानी संस्कृतीनुसार हे गार्डन बांधण्यात आलं आहे. या गार्डनमध्ये तुम्ही अनवाणी पायाने चाललात तर तुम्हाला अधिक आनंद मिळेल. हे गार्डन म्हणजे एक अद्भूत नजारा आहे, असं येथे जाऊन आलेले पर्यटक सांगतात. त्यामुळे तुम्हीही निसर्गाचा चमत्कार पाहायला एकदा नक्की भेट द्या.