खासदाराचे फणस चोरीला, पोलिस यंत्रणा लागली कामाला

दिल्लीत जनता दल संयुक्तचे खासदार महेंद्र प्रसाद यांच्या निवासस्थानातील फणसाच्या झाडावरील दोन फणस चोरीला गेल्याची तक्रार दिल्ली पोलिसांकडे दाखल झाली आहे.

ऑनलाइन टीम

नवी दिल्ली, दि. २० -  नेते पोलिसांना कशासाठी कामाला लावतील याचा नेमच नसतो. आता दिल्लीत जनता दल संयुक्तचे खासदार महेंद्र प्रसाद यांच्या निवासस्थानातील फणसाच्या झाडावरील दोन फणस चोरीला गेल्याची तक्रार दिल्ली पोलिसांकडे दाखल झाली आहे. यावर कळस म्हणजे दिल्ली पोलिसांनीही या 'गंभीर' घटनेची तातडीने दखल घेत बंगलाच्या आवारातून बोटांचे ठसेही जमा केले आहेत. 

जदयूचे राज्यसभेतील खासदार महेंद्र प्रसाद यांच्या तुघलक रोड येथील बंगल्यात फणसाचे झाड आहे. या झाडावरील नऊपैकी दोन फणस चोरीला गेल्याचे गुरुवारी सकाळी निदर्शनास आले. प्रसाद यांनी या घटनेची माहिती खासगी सचिवाला दिली व त्याने पोलिसांकडे तक्रार दाखल केली. बलात्कार, हत्यासारखे गुन्हे रोखण्यात अपयशी ठरलेल्या दिल्ली पोलिसांनी या गुन्ह्यात मात्र कमालीची सतर्कता दाखवली. नेत्याच्या घरात चोरी झाल्याने दहा पोलिस अधिका-यांचे पथक प्रसाद यांच्या निवासस्थानी दाखल झाले. त्यांनी बंगल्याच्या आवाराची पाहणी करुन हाताचे ठसे जमा केले. बगिच्यातील पायांच्या ठशांवरुन बाहेरुन आलेल्या लहान मुलांनी ही चोरी केली असावे असा अंदाज पोलिसांनी वर्तवली आहे. हाताचे ठसे जमा करुन फॉरेंसिक लॅबकडे पाठवले आहेत. सध्या बंगल्यातील सुरक्षा रक्षक, सेवक आणि वाहनचालकांची चौकशी सुरु असल्याचे पोलिसांनी सांगितले. 

दरम्यान,यापूर्वी उत्तरप्रदेशमधील समाजवादी पक्षाचे नेते आझम खान यांच्या घरातून हरवलेल्या म्हशी शोधण्यासाठी पोलिस यंत्रणेला कामाला लावल्याचे समोर आले होते.