दुबई हे पर्यटकांसाठी हॉट डेस्टिनेशन आहे. येथे जगातील महागड्या वस्तू पाहायला मिळतात. अशाच एक दुबईची माहगडी खासियत सध्या प्रचंड चर्चेत आहे ती एका ट्रॅव्हलर सेलिब्रिटीच्या पोस्टमुळे. अभिनेत्री आणि ट्रॅव्हल व्लॉगर शेनाझ ट्रेझरीवाला (Shenaz Treasurywala) हिने अलीकडेच दुबईतल्या महागड्या आईसक्रीमची चव चाखतानाचा व्हिडिओ तिच्या इन्स्टाग्राम अकाउंटवर प्रसिद्ध केला आहे. हे आईसक्रिम जगातलं सर्वात महागड आईसक्रिम आहे. या आईस्क्रिमची किंमत तब्बल 840 डॉलर्स म्हणजे सुमारे 60 हजार रुपये एवढी आहे.
एवढी किंमत ऐकल्यानंतर तुमच्या मनात नक्की असं आलं असेल, की 'एवढं काय सोनं लागून गेलंय का त्या आईसक्रीमला?' या प्रश्नाचं उत्तर होकारार्थी आहे. या आईसक्रीममध्ये खरंच 23 कॅरेट सोनंही (edible Gold) असतं. अर्थातच खाण्यायोग्य प्रकारचं सोनं त्यात वापरलेलं असतं. हे महागडं आईसक्रीम ताज्या व्हॅनिला बीन्सपासून तयार केलेलं असतं. त्यात एम्ब्रोसियल इराणी केशर, इटालियन ब्लॅक ट्रफल्सही असतात. दुबईतल्या जुमैरा रोडवरच्या एका कॅफेत हे आईसक्रीम मिळतं. या सगळ्यावर कडी म्हणजे हे आईसक्रीम Versace या इटालियन लक्झरी फॅशन कंपनीच्या अत्यंत महागड्या बाउलमध्ये सर्व्ह केलं जातं. या सगळ्यामुळे या आईसक्रीमची किंमत एवढी महागडी आहे. ब्लॅक डायमंड नावाने हे आईसक्रीम ओळखलं जातं.