Ashtray In Airplane Toilet : तुम्ही कधी विमानात बसले असाल किंवा नसालही, पण तुम्हाला हे नक्कीच माहीत असेल की, विमान सिगारेट ओढण्यास मनाई आहे. इतकंच नाही तर असं कुणी केल्यास व्यक्तीला तुरूंगाची हवा देखील खावी लागू शकते. मात्र, मुख्य मुद्दा असा आहे की, जर विमानात स्मोकिंग करण्यास मनाई असते तर मग विमानाच्या टॉयलेटमध्ये अ‍ॅशस्ट्रे (Ashtray) का असतो? अनेकांना हा प्रश्न पडत असेल, पण सगळ्यांनाच याचं उत्तर माहीत नसतं. तेच आज आम्ही तुम्हाला सांगणार आहोत.
काय सांगतो नियम?
जगभरातील सगळ्याच एअरलाईन्सच्या विमानांमध्ये स्मोकिंग करण्यावर पूर्णपणे बंदी आहे. १९८० दरम्यान बऱ्याच एअरलाइन्सनी स्मोकिंगवर बंदी घातली होती. २००० सालापर्यंत हा नियम सगळीकडे लागू करण्यात आला. जर हा नियम कुणी मोडला तर त्यांना दंड भरावा लागतो आणि त्यांच्यावर कायदेशीर कारवाई देखील केली जाते.
मग अ‍ॅशट्रेचं काय काम?
आता बऱ्याच लोकांना असं वाटू शकतं की, विमानाच्या टॉयलेटमध्ये अ‍ॅशस्ट्रे लोकांना चोरून स्मोकिंग करण्यासाठी लावला जात असेल. पण असं अजिबात नाहीये. हा अ‍ॅशस्ट्रे विमानातील टॉयलेटमध्ये सुरक्षेच्या दृष्टीने लावला जातो. आंतरराष्ट्रीय विमान नियमांनुसार प्रत्येक कमर्शिअल फ्लाइटच्या टॉयलेटमध्ये एक अ‍ॅशस्ट्रे असणं बंधनकारक आहे. भलेही स्मोकिंगची परवानगी नसो.
सुरक्षेच्या दृष्टीनं महत्वाचा
नियम तयार करणारे असं मानून चालतात की, कितीही कठोर नियम का असेना, पण एखादा प्रवासी असा असतो जो लपून स्मोकिंग करण्याचा प्रयत्न करू शकतो. जर कुणी असं केलं आणि त्याला सिगारेट विझवण्यासाठी जागा मिळाली नाही तर ती व्यक्ती सिगारेट कुठेही फेकू शकते. जसे की, कचऱ्याचा डबा.
कचऱ्याच्या डब्यामध्ये भरपूर टिशू पेपर आणि इतरही आग पकडणाऱ्या गोष्टी असतात. अशात जर कुणी पेटलेली सिगारेट त्यात टाकली तर आग लागण्याचा धोका अधिक वाढतो. अर्थातच विमानात आग लागणं सगळ्यात भयानक आपात स्थितींपैकी एक आहे.
हाच तो धोका आहे ज्यापासून बचाव करण्यासाठी विमानाच्या वॉशरूममध्ये अ‍ॅशस्ट्रे दिलेला असतो. याचा उद्देश हा असतो की, जर एखाद्या प्रवाशानं नियम तोडून सिगारेट ओढली तर त्याच्याकडे ती विझवण्यासाठी जागा असावी. जेणेकरून आग लागण्याचा धोका टाळता यावा.