रॅपरच्या डोक्यावर ‘उगवले’ सोन्याचे केस!

सोबतचा फोटो पाहिलात ? हा एक  रॅपर आहे आणि त्याच्या डोक्यावर दिसतात ते केस खऱ्याखुऱ्या सोन्याचे आहेत! हे काय आता नवीन?

तरुण मुलामुलींच्या केसांच्या स्टाईलमध्ये चकीत व्हावे, आश्चर्य वाटावे असे काही नसते खरेतर!  भारताच्या ध्वजापासून ते जागतिक फुटबॉल स्पर्धेच्या लोगोपर्यंत कुठलीही चित्रं या तरुणाईच्या डोक्यावर उगवलेली आपण पाहिली आहेत. माध्यमांमध्ये ही छायाचित्रे, व्हीडीओ, क्लिप्स आवर्जून दाखवली जातात. या गोष्टीचं अनेकांना अप्रूप वाटतं, तर ही काय थेरं चाललीयत म्हणून अनेकजण नाकंही मुरडतात.  तीच गोष्ट केस कलर करण्याची. तरुणाईनं आपल्या केसांवर इतके रंग चोपडले, की इंद्रधनुष्य त्यापुढे कधीच फिकं पडलं. आजकाल घरांना रंग देण्यासाठी हजारो रंग उपलब्ध झाले आहेत, तेही कमी पडतील, इतकी या केसांच्या रंगरंगोटीची तऱ्हा!!

पण पुढे काय? आता नवीन काय करायचं? आपण हटके दिसलं पाहिजे, सोशल मीडियावर आपले फाॅलोअर्स झपाट्यानं वाढले पाहिजेत, यासाठी काय करायला हवं??..
डोक्यावरच्या केसांमधून ‘वेगवेगळे रस्ते’ काढण्याचं नावीन्य कधीच ओसरलं. केसांवर लावायचे रंगही जवळपास ‘संपले’.. आता यापुढे काहीतरी हटके स्टाईल हवी.. 

अशीच एक हटके स्टाईल मेक्सिकोमधल्या या तरुण रॅपरला सापडली. डॅन सूर हे त्याचं नाव. २३ वर्षांच्या या रॅपरनं त्याच्या क्षेत्रात तसं बरं नाव कमावलं होतं, पण त्याला आपल्या कलेबरोबर इतरही गोष्टींनी फेमस व्हायचं होतं. खूप दिवस, महिने तो यावर विचार करीत होता. शेवटी त्यावरचा उपाय त्याला सापडला. त्यानं आपल्या डोक्यावरचे सारे केस काढून टाकले आणि त्याजागी चक्क सोन्याच्या साखळ्या इम्प्लांट केल्या. चांगल्या मोठमोठ्या. अगदी चेहराही झाकल्या जाणाऱ्या आणि खांद्यापर्यंत येणाऱ्या! 

- त्याला जे पाहिजे होतं, तेच घडलं! डॅन सूर रातोरात फेमस झाला. सोशल मीडिया आणि इतर माध्यमांत त्याचे फोटो, व्हीडीओ झपाट्यानं व्हायरल, शेअर व्हायला लागले! तरुणाईला त्याची ही हटके स्टाईल खूपच पसंत पडली.

पण या स्टाईलचा खर्च आणि वेदना मात्र सर्वसामान्यांना परवडणाऱ्या नाहीत. केसांच्या जागी डोक्यावर सोन्याच्या साखळ्या इम्प्लांट करण्याच्या आधी त्याला मोठी सर्जरी करावी लागली. कवटीत हूक बसवावे लागले आणि त्यात या साखळ्या अडकवाव्या लागल्या. सोन्याच्या या साखळ्यांचा खर्च किती आला असेल, याची आपण कल्पना करू शकतो. पण त्यासाठी त्यानं जे ऑपरेशन केलं, त्यासाठीही त्याला बक्कळ पैसा मोजावा लागला. कारण त्यासाठी निष्णात डॉक्टरांच्या टीमची गरज होती आणि काही दिवस हॉस्पिटलमध्ये राहण्याचीही गरज होती. 

हे किती कष्टाचं, मेहनतीचं, खर्चाचं आणि वेळखाऊ काम असतं याची थोडीफार कल्पना आपल्याकडच्या ‘गंजेभाऊंना’ असेल. टकलावर केस उगवण्यासाठी वाट्टेल ते प्रयोग करूनही आणि वारेमाप पैसा घालवूनही डोक्यावर कोणत्याही केसांचं बी रुजलं नाही, हे कळल्यावर अनेकजण विगचा आश्रय घेतात, तर ज्यांच्याकडे पैसे  असतात, ते  आपल्या टकलावर केस इम्प्लांट करून घेतात. हे केस इम्प्लांट करण्यासाठी किती खर्च येतो आणि किती वेळ लागतो? टकलावर एक एक केसाची लावणी करताना संयम कसा सुटतो, हे त्यांना माहीत असेल.. पण डॅनचं काम त्याहूनही अवघड होतं, मात्र त्याची जिद्द त्यापेक्षा मोठी होती. अट्टहासानं या सगळ्या गोष्टी त्यानं करून घेतल्या. 

डॅन सांगतो, सुरुवातीपासूनच मला काहीतरी वेगळं, हटके करायचं होतं, जे आधी कोणीही केलेलं नसेल. केसांना रंग लावणं आणि केसांतून रस्ते काढण्याचे मार्ग आता मागच्या पिढीतले झाले. खूप विचार केल्यावर सोन्याच्या साखळ्या इम्प्लांट करण्याची आयडिया मला सुचली आणि मी ती अमलात आणली. इतकी हटके आयडिया लढवणारा मी आजपर्यंतचा जगातला पहिलाच माणूस आहे.

आता माझी ही स्टाईलही जगभरात फेमस होईल आणि सर्व देशांतली तरुणाई माझी स्टाईल कॉपी करताना दिसेल, पण मी या स्टाईलचा जनक आहे आणि माझ्या पावलावर पाऊल टाकून अनेक जण चालताहेत, याचा मला कायम अभिमान राहील. तरुणाईनं माझी स्टाईल ढापायला माझी काही हरकत नाही, पण निदान काही दिवस, महिने तरी त्यांनी माझं हे नवेपण कायम राहू द्यावं असं मला वाटतं..’’ माध्यमांनीही डॅनची ही हटके स्टाईल उचलून धरताना त्याला वारेमाप प्रसिद्धी दिली. न्यूयॉर्क पोस्टनंही असं करणारा डॅन हा जगातला पहिला माणूस असल्याचं म्हटलं आहे. 

फॉलोअर्सची संख्या वीस लाख!
डॅननं यंदा एप्रिलमध्ये डोक्यावर ही सर्जरी करून घेतली. तोपर्यंत सोशल मीडियावर त्याच्या फॉलोअर्सची संख्या पंधरा ते वीस हजारांच्या आसपास होती. पण त्याच्या या नव्या स्टाईलमुळे चाहत्यांची संख्या झटक्यात वीस लाखांपर्यंत गेली आणि अजूनही ती वाढतेच आहे. डॅननं आपल्या डोक्यावर सोन्याचे केसच केवळ उगवून घेतले नाहीत, तर त्याच्या तोंडात आता सोन्याचे दातही ‘उगवले’ आहेत! त्याची ही स्टाईल कॉमन होण्याच्या आधीच तुम्हीही थोडं डोकं खाजवून ठेवा, म्हणजे डॅनची कॉपी केली, असं तुम्हाला कोणी म्हणणार नाही..