वर्षभरात वडील, आई आणि आता मुलाचा मृत्यू

जळगाव : अपार्टमेंटच्या चौथ्या मजल्यावरून पडल्याने विजय प्रल्हाद शिनकर (४८, मूळ रा. वरणगाव, ता. भुसावळ) यांचा मृत्यू झाल्याची घटना शनिवारी पहाटे चार वाजता गुड्डूराजानगराला लागून असलेल्या बी.जे.नगरात उघडकीस आली. ही घटना आत्महत्या आहे की तोल जाऊन पडल्याने मृत्यू झाला, हे स्पष्ट झालेले नाही. शिनकर यांच्या परिवारात वडील, आई आणि आता मुलाचा मृत्यू झाल्यामुळे मृत्यूची शृंखला सुरू आहे. याप्रकरणी शहर पोलीस ठाण्यात अकस्मात मृत्यूची नोंद करण्यात आली आहे.

सूत्रांनी दिलेल्या माहितीनुसार, बी.जे.नगरातील सिद्धांत अपार्टमेंटमध्ये चौथ्या मजल्यावर विजय शिनकर हे पत्नी कल्पना, मुलगी श्रद्धा व मुलगा सारंग असे चौघे वास्तव्याला होते. शिनकर हे वैद्यकीय प्रतिनिधी म्हणून काम करायचे. दोन वर्षांपूर्वीच ते वरणगाव येथून जळगावात स्थायिक झाले. सिद्धांत अपार्टमेंटमध्ये त्यांनी स्वत:चा फ्लॅट घेतलेला होता. शुक्रवारी रात्री १२ वाजेपर्यंत पत्नी व दोन्ही मुलांशी त्यांनी गप्पा मारल्या. त्यानंतर सर्व जण झोपले. शनिवारी पहाटे चार वाजता मुलगा सारंग हा लघुशंकेसाठी उठला असता वडील जागेवर दिसले नाहीत. बाथरूमध्येही नसल्याने तो इमारतीच्या गच्चीवर बघायला गेला, तेथेही ते नव्हते. त्यामुळे त्याने बहीण श्रद्धा हिला उठवले व दोघे जण खाली आले असता वडील रक्ताच्या थारोळ्यात पडल्याचे दिसून आले. हा प्रकार पाहून त्यांनी आक्रोश केला. पत्नी व शेजारच्या लोकांनी धाव घेऊन त्यांना तातडीने शासकीय वैद्यकीय महाविद्यालय व रुग्णालयात हलविले असता तेथे डॉक्टरांनी मृत घोषित केले.

आई, वडिलानंतर मुलाचा मृत्यू

शिनकर परिवारात वर्षभरात मृत्यूची ही तिसरी घटना आहे. वडील प्रल्हाद शिनकर यांचा काही महिन्यांपूर्वीच मृत्यू झाला होता. त्यानंतर तीन महिन्यांनी विजय यांच्या आईचा मृत्यू झाला, तर आता स्वत: विजय यांचा मृत्यू झाला. सलगच्या घटनांनी शिनकर परिवार हादरला आहे. विजय यांना एक बहीण असून ती विवाहित आहे. सुरत येथे वास्तव्याला आहे. ती दुपारी आल्यानंतर शहरात अंत्यसंस्कार करण्यात आले. मुलगी श्रद्धा सीएचे तर मुलगा सातवीत शिक्षण घेत आहे.