ममुराबाद ग्रामपंचायतीची धुरा कोणाकडे?

ममुराबाद : गावातील सरपंचपदाचे आरक्षण नागरिकांचा मागास प्रवर्ग (ओबीसी) पुुरुषसाठी राखीव निघाल्याने ग्रामपंचायतीची धुरा नेमकी कोणाकडे जाते? त्याकडे आता ग्रामस्थांचे लक्ष लागले आहे. दरम्यान, सरपंचपदासाठी इच्छुकांकडून सदस्यांची जुळवाजुळव सुरू झाली असून निवडणुकीची तारीख घोषित होताच संबंधित सर्व सहलीला रवाना होण्याच्या तयारीत आहेत.

सहा वॉर्डातील १७ जागांसाठी पार पडलेल्या ग्रामपंचायतीच्या निवडणुकीनंतर सरपंचपदाच्या आरक्षणाकडे नवनिर्वाचित सदस्यांसह त्यांच्या समर्थकांचे लक्ष लागले होते. गेल्या वेळी सरपंचपदाचे आरक्षण हे अनुसूचित जमातीसाठी राखीव होते. यंदा नेमके कोणते आरक्षण निघते त्याबद्दल संबंधितांमध्ये प्रचंड उत्सुकता होती. सरपंचपदाचे आरक्षण मनाजोगते निघावे म्हणून अनेकांनी देव पाण्यातसुद्धा ठेवले होते. त्यातील काहींनी अंदाज बांधून आरक्षण घोषित होण्यापूर्वी मोर्चेबांधणीही सुरू केली होती. प्रत्यक्षात सरपंचपदाचे आरक्षण नेमके नागरिकांचा मागास प्रवर्ग पुरुषसाठी राखीव निघाल्याने अनेकांच्या आशेवर सपशेल पाणी फेरले गेले. तर ज्यांच्या मनासारखे आरक्षण निघाले त्यांच्या आनंदास पारावर राहिला नाही.

प्राप्त माहितीनुसार गावात नागरिकांचा मागास प्रवर्ग राखीव पुरुषाच्या जागेवर फक्त दोनच सदस्य निवडून आले आहेत. अर्थात, त्या दोघांमध्येच सरपंचपदाची निवडणूक होण्याची चिन्हे आहेत. वॉर्ड एकमधून यंदा सहाव्यांदा निवडलेले हेमंत गोविंद चौधरी आणि वॉर्ड दोनमधून यंदा प्रथमच निवडलेले शैलेंद्र यशवंत पाटील या दोघांचा त्यात समावेश आहे.

---------------------

चौधरी की पाटील सरपंच ?

हेमंत चौधरी यांनी यापूर्वी २००३ मध्येही काही काळ ममुराबाद ग्रामपंचायतीचे सरपंचपदसुद्धा भूषविले आहे. तर शैलेंद्र पाटील हे यंदा पहिल्याच प्रयत्नात ग्रामपंचायत सदस्य व सरपंचपदाचे दावेदार बनले आहेत. १७ पैकी निम्म्यापेक्षा जास्त सदस्यांचे संख्याबळ जमवून दोघांपैकी कोण सरपंचपदी विराजमान होते त्याची उत्कंठा ग्रामस्थांना लागली आहे.

------------------------