सुप्रीम कॉलनीतील रहिवाशांचा पाणी प्रश्न लवकरच सुटणार

जळगाव : शहरातील सुप्रीम कॉलनीतील रहिवाशांचा पिण्याच्या पाण्याचा प्रश्न लवकरच सुटणार असून, अमृत योजनेंतर्गत नियमीत पाणीपुरवठा करण्यासाठीचे काम अंतिम टप्प्यात आले आहे. तसेच वाघूरच्या मुख्य जलवाहिनीला सुप्रीम कॉलनीची नवीन जलवाहिनी जोडण्याच्या कामालाही सुरुवात झाली असून, सोमवारी महापौर भारती सोनवणे यांनी या कामाची पाहणी केली.

यावेळी उपमहापौर सुनील खडके, नगरसेवक कैलास सोनवणे, गणेश सोनवणे, प्रभाग समिती सदस्य विठ्ठल पाटील, चंद्रकांत भापसे यांच्यासह मनपाचे अधिकारी उपस्थित होते.

सुप्रीम कॉलनीत उभारण्यात आलेल्या या पंप हाऊसमध्ये दोन उच्च क्षमतेचे विद्युत पंपही दाखल झाले आहेत. पंप बसविण्यासाठी आवश्यक असलेले गर्डर टाकण्याचे काम सुरू असून , त्यानंतर लागलीच पंप बसविण्यात येऊन चाचणी घेतली जाणार आहे. दरम्यान, सुप्रीम कॉलनीत नव्याने टाकण्यात आलेली जलवाहिनी ही नवीन भूमीगत जलकुंभाला जोडण्यात आलेली आहे. वाघूरची मुख्य जलवाहिनी महामार्गाजवळून जाते. महामार्ग चौपदरीकरणाचे काम सुरू असून त्याठिकाणी मक्तेदाराने माती टाकलेली असल्याने जोडणीच्या कामाला विलंब होणार आहे. त्यामुळे महापौरांनी महामार्गाच्या मक्तेदाराला तात्काळ माती बाजूला करण्याच्याही सूचना केल्या.

.