सावखेडा शेतशिवारात कपाशीचे पीक अज्ञाताने उपटून फेकले

वरखेडी, ता. पाचोरा : पाचोरा तालुक्यातील लासुरे येथील प्रगतशील शेतकरी भैयासाहेब दयाराम पाटील यांच्या शेतातील २ हेक्टर ९४ आर पैकी साडेतीन एकरांवरील उभ्या कपाशीची झाडे अज्ञात इसमांनी उपटून फेकल्याची घटना उघडकीस आली आहे. याबाबत पीडित शेतकऱ्याने पिंपळगाव (हरेश्वर) पोलिसात दोन संशयितांविरुद्ध गुन्हा दाखल केला आहे.

पाचोरा तालुक्यातील लासुरे येथील शेतकरी भैयासाहेब दयाराम पाटील यांची सावखेडा बु. शेतशिवारात गट क्रं. १०२ व २ हेक्टर ९४ आर शेतजमीन आहे. या क्षेत्रावर त्यांनी कपाशीची लागवड केली आहे. यावर्षी परिसरात चांगल्याप्रकारे पाऊस झाल्याने कपाशीचे पीक दमदार होते, असे असताना अंधाराचा फायदा घेत अज्ञातांनी त्यांचे शेतातील साडेतीन एकर क्षेत्रावरील कपाशीची झाडे उपटून फेकल्याने त्यांचे उत्पादनाचे गणितच बिघडले. भैयासाहेब पाटील यांना या साडेतीन एकर कपाशीच्या पिकापासून सुमारे तीन लाखांचे उत्पन्न अपेक्षित होते. मात्र, त्यांच्या हातातोंडाशी आलेला घास अज्ञात इसमांनी हिरावून घेतला आहे.

भैयासाहेब पाटील यांचा मुलगा शुभम हा आज दुपारी १२ वाजेच्या सुमारास शेतात गेला असता त्याचे लक्षात हा प्रकार येताच त्याने ताबडतोब वडिलांना या घटनेची माहिती दिली असता भैयासाहेब पाटील यांनी शेतात जाऊन हा घडलेला प्रकार पाहिला. झालेल्या घटनेबाबत पिंपळगाव (हरेश्वर) पोलिसात दोन संशयितांविरुद्ध त्यांनी सांगितल्याप्रमाणे पिंपळगाव (हरेश्वर) पोलीस ठाण्यात गुन्ह्याची नोंद करण्यात आली आहे. घटनेचा पुढील तपास सहायक पोलीस निरीक्षक कृष्णा भोये यांचे मार्गदर्शनाखाली पोलीस हवालदार विजय माळी करीत आहेत.