सुशील देवकर
मनपाने शहरातील सफाईचा ठेका दिलेल्या नाशिक येथील वॉटरग्रेस या कंपनीशी माजी मंत्री आमदार गिरीश महाजन यांचे निकटवर्तीय सुनील झंवर यांचा संबंध असल्याचे व त्याचा कारभार झंवर यांच्या रमेश मोटार ड्रायव्हींग येथील कार्यालयातूनच सुरू असल्याचे बीएचआर प्रकरणातील आर्थिक गुन्हे शाखेच्या पथकाने मारलेल्या छाप्यात सापडलेल्या कागदपत्रांवरून उघड झाले. त्यामुळे सत्ताधारी भाजपाचे तर वस्त्रहरण झालेच, मात्र झंवर यांच्याशी शिवसेनेच्या नगरसेवकांचेही असलेले घनिष्ठ संबंध जगजाहीर असल्याने विरोधीपक्ष सेनेचेही वस्त्रहरण झाले आहे. मनपातील सभांमध्ये किंवा बाहेरही एकमेकांवर केवळ आरोप करून विरोधाचे नाटक करायचे मात्र हितसंबंध जपताना एकत्र यायचे, अशीच वृत्ती सरसकट असल्याचे यातून दिसून आले आहे.
झंवर हे गिरीश महाजनांचे निकटवर्तीय असल्याचे जगजाहीर असतानाच बीएचआर प्रकरणात जप्त मालमत्ता अवसायकाशी संगनमताने अल्प दरात घेतल्याचा व त्यासाठी ठेवीदारांकडून बेकायदेशिरपणे ठेवींच्या पावत्या जेमतेम ३० टक्केच मोबदला देऊन घेतल्याचे आरोप झंवर यांच्यावर झाल्याने महाजन यांची अडचण झाली आहे. त्यातच भाजपाची सत्ता असलेल्या जळगाव मनपात सफाईचा ठेका असलेल्या वॉटरग्रेसमध्येही झंवर यांचीच भागिदारी असल्याचेही उघड झाल्याने यापूर्वी सफाई ठेक्यावरून नगरसेवकांवर होत असलेल्या पाकिट घेण्याच्या आरोपांना पुष्टीच मिळाली आहे.
मनपात वॉटरग्रेसचा ठेका देताना संबंधीत ठेकेदाराने मोडसऑपरेंडीप्रमाणे स्थानिक सत्ताधारी गटातील काही नगरसेवकही भागीदार करून घेतले. जेणे करून कामाबाबत ओरड होणार नाही. किंवा ओरड करणाऱ्यांना शांत करता येईल. मात्र तरीही ते शक्य न झाल्याने अखेर हा ठेका बंद करण्यात आला. तेव्हा विरोधी पक्ष असलेल्या सेनेने आक्रमक भूमिका घेतली होती. तोपर्यंत या ठेक्यात झंवर यांची भागिदारी नव्हती, असे समजते. मात्र हा ठेका बंद केल्यावर भाजपाच्याच एका पदाधिकाऱ्याने शहरातील सफाईचा ठेका घेतला. तो काही दिवस चालला. मात्र मनपाच्या राजकारणातील कुरघोड्या सुरूच असल्याने प्रशासनाला हाताशी धरत वॉटरग्रेसलाच पुन्हा काम सुरू करू द्यावे लागेल, असे सांगत वॉटरग्रेसची पुन्हा एन्ट्री झाली. यावेळी मात्र सुनील झंवर हे या ठेक्यात भागीदार झाले होते, असे समजते. त्यांच्यावरच सर्व नगरसेवकांना सांभाळण्याचीही जबाबदारी देण्यात आल्याची चर्चा आहे. त्यामुळेच राष्ट्रवादीने केलेल्या पाकिटांच्या आरोपांना बळ मिळाले. विशेष म्हणजे झंवर यांच्या एन्ट्रीनंतर सफाईबाबत सभांमध्ये होणाऱ्या तक्रारी जवळपास बंदच झाल्या. विरोधकही शांत झालेले दिसले. मात्र जनतेला आत काय चालले आहे? हे समजत नसल्याने आरोप, प्रत्यारोप करून दिशाभूल करणे सुरूच होते. मात्र बीएचआर प्रकरणी झंवर यांच्याकडे पडलेल्या छाप्यानंतर ते प्रकाशझोतात आल्याने सत्ताधाऱ्यांसह विराेधकांचेही वस्त्रहरण झाले. त्यामुळेच पुन्हा रविवारी पत्रकार परिषद घेत भाजपाने तर पत्रक काढत सेनेने स्वत:वरील आरोप फेटाळत एकमेकांवर आरोपांची तोफ डागली आहे.