जळगाव : दुचाकीने कंपनीत जात असतांना समोरून येणाऱ्या ट्रकची जोरदार धडक बसल्याने डिगंबर सोनू नेमाडे (वय ६५, रा. गजानन नगर) यांचा मृत्यू झाला. चिंचोली नजीकच्या राधाकृष्ण लॉनजवळ सोमवारी सकाळी आठ वाजताच्या सुमारास हा अपघात घडला. याप्रकरणी ट्रक ताब्यात घेण्यात आला असून चालकालाही अटक करण्यात आली आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
डिगंबर नेमाडे हे एमआयडीसीतील भाग्यश्री प्लास्टिक कंपनीत कामावर होते. नेहमीप्रमाणे सोमवारी सकाळी ८ वाजण्याच्या सुमारास ते कंपनीत कामाला जात असतांना समोरून येणाऱ्या ट्रकने त्यांना जोरदार धडक दिली. यात ते गंभीर जखमी झाले होते. याच वेळी त्यांचे मित्र भगावान सुकलाल निकम हे दुकानात जात असतांना त्यांनी डिगंबर यांना ओळखले. त्यांनी तातडीने जखमी डिगंबर नेमाडे यांनी शहरातील खासगी रूग्णालयात दाखल केले. प्रकृती गंभीर असल्याने त्यांना गुलाबराव देवकर वैद्यकिय महाविद्यालयात रवाना करण्यात आले. येथे वैद्यकिय अधिकारी डॉ. सचिन अहिरे यांनी त्यांना मृत घोषीत केले. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली. एमआयडीसी पोलीसांनी ट्रक ताब्यात घेतले असून चालकास अटक करण्यात आली आहे. प्राथमिक तपास उपनिरीक्षक संदीप पाटील, संतोष पवार, संदीप धनगर करीत आहे. डिगंबर नेमाडे हे जळगावात एकटे राहत होते. १ वर्षापूर्वी त्यांच्या पत्नीचे निधन झाले होते. त्यांच्या पश्चात गिरीष आणि मनोज हे दोन मुले असून दोन्ही नोकरीच्या निमित्ताने नाशिक आणि पुणे येथे स्थायिक आहेत.