दूध संघ भरती प्रक्रियेतील अडीच हजारांवर उमेदवारांना निकालाची प्रतीक्षा

लोकमत न्यूज नेटवर्क

जळगाव : जिल्हा दूध संघातील भरती प्रक्रियेवर हरकत घेतल्याने परीक्षा होऊनही निकाल लागू न शकल्याने अर्ज केलेल्या अडीच हजारांवर उमेदवारांना निकालाची प्रतीक्षा लागली आहे. अधिकारी वर्गासाठी ४००, तर सहायक लिपिकसाठी तब्बल दोन हजार ५०० अर्ज आले होते.

जिल्हा दूध संघात अधिकारी वर्गासाठीच्या ३२, तर सहायक लिपिक वर्गाच्या १३२ जागांसाठी भरती प्रक्रिया सुरू करण्यात आली. यासाठी ऑनलाइन पद्धतीने उमेदवारांनी अर्ज दाखल केले व त्यानंतर परीक्षा झाली. मात्र, या भरती प्रक्रियेवर दूध संघाच्या माजी कर्मचाऱ्यांनीच हरकत घेतली. दूध संघाच्या संचालक मंडळाची मुदत संपली असून, ते भरती करू शकत नाहीत, तसेच आरक्षण लागू असताना विना आरक्षण भरती प्रक्रिया राबविली जात असल्याचा आरोप करीत उच्च न्यायालयात याचिका दाखल केली. त्यामुळे या परीक्षेचा निकाल लागू शकलेला नाही.

परीक्षेचा निकाल लागल्यानंतर तोंडी परीक्षा होणार असून, त्यानंतरच पात्र उमेदवारांना सामावून घेतले जाणार आहे. मात्र, ही सर्व प्रक्रिया न्यायालयाच्या निर्णयावर अवलंबून राहणार आहे. त्यामुळे उमेदवारांचे त्याकडेही लक्ष लागलेले आहे.