श्वास घ्यायला त्रास होणाऱ्या १६ दिवसाच्या बाळावर उपचार

जळगाव : श्वास घ्यायला त्रास होणाऱ्या व शरीरात रक्ताचे प्रमाण कमी असलेल्या एका नवजात बाळाला वाचविण्यात शासकीय वैद्यकीय महाविद्यालय व रुग्णालयातील वैद्यकीय यंत्रणेला यश आले आहे. हे बाळ जन्मल्यानंतर दोन दिवस रडले नव्हते, त्यामुळे त्याची प्रकृती अत्यवस्थ झाल्याचे सांगण्यात येत आहे. मात्र, डॉक्टरांची शर्थीचे प्रयत्न करून या बाळा वाचविले.

नांद्रा येथील शेतकरी कुटुंबातील गर्भवती एका महिलेने शाहू महाराज दवाखान्यात १० मे रोजी एका कन्येला जन्म दिला. मात्र, बाळाला श्वास घ्यायला त्रास होत होता. रक्ताच्या गाठी पातळ होण्याची यंत्रणा काम करीत नव्हती. अशा स्थितीत या बाळाला जीएमसीत दाखल करण्यात आले होते. नवजात शिशु अतिदक्षता विभागातील प्रमुख डॉ. वृषाली सरोदे, डॉ. शैलजा चव्हाण, डॉ. अखिलेश गोलवाडे, डॉ. हितेश भोळे, इन्चार्ज सिस्टर शिल्पा कोकाटे, अधिपरिचारिका संगीता शिंगारे यांनी अधिष्ठाता डॉ.जयप्रकाश रामानंद, बालरोग व चिकित्सा विभाग प्रमुख डॉ. बाळासाहेब सुरोशे यांच्या मार्गदर्शनाखाली या बाळावर यशस्वी उपचार करून १६ दिवसांनी त्याला घरी पाठविण्यात आले. या बाळावर महात्मा फुले जनआरोग्य योजनेतून मोफत उपचार करण्यात आले.