तिघा तरुणांकडे सापडले पिस्तूल अन् चॉपर

जळगाव : पिंप्राळा भागातील भवानी मंदिराजवळील एका पानटपरीवर थांबलेल्या महेश वासुदेव पाटील (वय २१, रा. हिरा शिवा कॉलनी) याच्याजवळ गावठी पिस्तूल तर आकाशवाणी चौकात कल्पेश अर्जुन चौधरी (वय २६, रा. विठ्ठल पेठ) व गोकूळ दिलीप शिंपी (वय २०, रा. मारुती पेठ) या दोघांजवळ चॉपर आढळून आले. महेशजवळ एक मॅग्झिनही मिळून आले. याप्रकरणी रामानंद नगर व जिल्हा पेठ पोलीस ठाण्यात आर्म ॲक्टचा गुन्हा दाखल करण्यात आला आहे.

पिंप्राळ्यात पानटपरीवर आलेल्या एका तरुणाकडे गावठी पिस्तूल असल्याचा निनावी फोन पोलीस निरीक्षक अनिल बडगुजर यांना आला होता. त्यानुसार त्यांनी सहायक पोलीस निरीक्षक दीपक बिरारी, विनोद सोनवणे, रवी पाटील, सागर देवरे व संजय सपकाळे यांच्या पथकाने घटनास्थळ गाठले असता, महेश याच्याजवळ पिस्तूल आढळून आले. परवानाबाबत त्याच्याकडे चौकशी केली असता त्याने नकार दिला. घटनास्थळावरच पंचनामा करून पिस्तूल जप्त करण्यात आले तर महेश याला अटक करण्यात आली.

शुक्रवारी मध्यरात्री १ वाजता आकाशवाणी चौकात थांबलेल्या कल्पेश अर्जुन चौधरी (वय २६, रा. विठ्ठल पेठ) व गोकूळ दिलीप शिंपी (वय २०,रा मारुती पेठ) यांची गस्तीवरील पोलिसांनी झडती घेतली असता खिशात चॉपर आढळून आला. दुचाकी व चॉपरसह त्यांना ताब्यात घेण्यात आले. दोघांना अटक करण्यात आली आहे.