पोलीस महानिरीक्षकांच्या नावावर एकमत होईना!

जळगाव : नाशिक परिक्षेत्राचे विशेष पोलीस महानिरीक्षक हे पद गेल्या तीन महिन्यांपासून रिक्त आहे. या पदावर अनेक अधिकाऱ्यांचा डोळा असून त्यादृष्टीने अनेकांनी प्रयत्न चालविले असले तरी सरकार पातळीवर मात्र मतभिन्नता असल्याने कोणत्याच एका नावावर ठाम मत होत नाही. त्यामुळे त्याचा सस्पेन्स अधिकच वाढत चालला आहे. दरम्यान, पुण्याचे सहपोलीस आयुक्त रवींद्र शिसवे व सोलापूरचे पोलीस आयुक्त अंकुश शिंदे ही दोन नावे सध्या तरी आघाडीवर आहेत.

राज्यात शिवसेना, राष्ट्रवादी काँग्रेस व काँग्रेस या तीन पक्षांचे सरकार आहे. कोणत्याही जिल्ह्यात महत्त्वाच्या पदावर अर्थात सुपरक्लासवन अधिकारी नियुक्त करायचा असेल तर त्या-त्या जिल्ह्याच्या पालकमंत्र्यांची ‘एनओसी’ आवश्यक असल्याचे सूत्र ठरविण्यात आल्याचे बोलले जात आहे. हे सूत्र विभागीय महसूल आयुक्त व परिक्षेत्राचे विशेष पोलीस महानिरीक्षक यांच्यासाठी लागू होत नाही. एका परिक्षेत्रात किमात चार ते पाच जिल्हे येत असल्याने प्रत्येक जिल्ह्यात वेगवेगळ्या पक्षाचे पालकमंत्री आहेत. त्यातही मुख्यमंत्रिपद शिवसेनेकडे तर गृहमंत्री पद राष्ट्रवादीकडे आहे. तीन पक्षांचे सरकार असल्याने गुंता अधिकच वाढला. प्रताप दिघावकर यांना सेवानिवृत्त होऊन तीन महिन्यांचा कालावधी लोटला आहे. तरीदेखील अद्यापही त्यांच्याजागी नवीन महानिरीक्षकांची नियुक्ती झालेली नाही. पोलीस अकादमीच्या संचालक अश्वती दोरजे यांच्याकडे तात्पुरता पदभार आहे.

इन्फो..

या पाच अधिकाऱ्यांच्या नावावर चर्चा

विशेष पोलीस महानिरीक्षक पदासाठी सर्वात जास्त आघाडीवर पुण्याचे सहपोलीस आयुक्त रवींद्र शिसवे व सोलापूरचे आयुक्त अंकुश शिंदे ही दोन नावे आहेत. त्याशिवाय राजेश प्रधान, ठाण्याचे अप्पर पोलीस आयुक्त दत्तात्रय कराळे व पुण्याचे अप्पर पोलीस आयुक्त डॉ. जालिंदर सुपेकर यांच्याही नावांची चर्चा आहे. शिंदे, कराळे व डॉ. सुपेकर हे तीन अधिकारी पूर्वी जळगावला अधीक्षक होते. यापैकी कराळे व सुपेकर यांची रँक उपमहानिरीक्षकाची आहे. अमरावती परिक्षेत्रात आरती सिंह यांना देण्यात आले आहे, त्यांची देखील रँक उपमहानिरीक्षकाचीच आहे. सरकारमध्ये एकमत झाले तर या दोघांपैकी एक नाव निश्चित होऊ शकते. त्यातही कराळे यांचे नाव आघाडीवर आहे. शक्यतो मराठी आयपीएस अधिकाऱ्याचीच या ठिकाणी नियुक्ती व्हावी असाही एक सूर सरकारमध्ये आहे. प्रवीण पडवळ, मकरंद रानडे व कैसर खालीद या तीन नावांची देखील मध्यंतरी चर्चा झाली होती. खालीद यांचा सुरुवातीलाच अमळनेर येथे परिविक्षाधीन कालावधी झालेला आहे.