निवृत्ती नगरात हॉकर्स व मनपा कर्मचाऱ्यांमध्ये झटापट

हॉकर्सकडून पावती फाडून मनपाकडून माल जप्त : हॉकर्स संतप्त; जप्त केलेला माल टाकलेल्या ट्रॅक्टरची चावी पळवली

लोकमत न्यूज नेटवर्क

जळगाव : शहरात आठवडा बाजाराला बंदी घालण्यात आली आहे. मात्र, शहरातील अनेक भागांत आठवडा बाजार भरत असून, त्याठिकाणी मनपाकडून कारवाई केली जात आहे. मात्र, बुधवारी शहरातील निवृत्ती नगर भागात भरलेल्या बाजारातील हॉकर्सकडून पावत्या फाडल्या व त्यानंतर काही वेळात मनपाच्या पथकाने माल जप्त केल्यामुळे संतापलेले हॉकर्स व मनपा कर्मचाऱ्यांमध्ये सकाळी १० वाजेच्या सुमारास चांगलीच झटापट झाली. हॉकर्सवर कारवाई करायचीच होती तर मग पावत्या का फाडल्या, असा प्रश्न करत हॉकर्सने मनपाच्या कारवाईचा विरोध केला.

दर बुधवारी शहरातील पिंप्राळा बाजारात आठवडा बाजार भरत असतो. मात्र, कोरोनामुळे आठवडा बाजार भरण्यास बंदी असल्याने पिंप्राळा भागात दर बुधवारी हॉकर्स बसण्याआधीच मनपाचे पथक दाखल होत असते. त्यामुळे हॉकर्सने देखील पिंप्राळ्यात बाजार न भरविता दर बुधवारी निवृत्ती नगरात बाजार भरवायला सुरुवात केली होती. याबाबत बुधवारी मनपा अतिक्रमण निर्मूलन विभागाकडे तक्रार प्राप्त झाल्यानंतर मनपाच्या पथकाने बुधवारी सकाळी १० वाजता जाऊन हॉकर्सवर कारवाई करण्यास सुरुवात केली.

भाजीपाल्यावर झोपून कारवाईला केला विरोध

मनपाचे पथक दाखल होताच या भागात हॉकर्सने आपला माल जमा करून सुरक्षित ठेवण्याचा प्रयत्न केला. मात्र, मनपा कर्मचाऱ्यांनी हा माल हिसकावून घेत जप्त करण्यास सुरुवात केली. यामुळे ग्रामीण भागातून आलेल्या हॉकर्सने कारवाईस विरोध करण्यास सुरुवात केली. मात्र, मनपाकडून माल जप्त करण्यास सुरुवात झाल्यामुळे अनेक हॉकर्सने आपला माल जप्त होऊ नये म्हणून भाजीपाल्यावर झोपून कारवाई करू नका, म्हणून मनपा कर्मचाऱ्यांकडे विनवण्या केल्या.

पावत्या फाडल्या तर कारवाई का?

निवृत्ती नगरात हॉकर्सने दुकाने थाटल्यानंतर विक्रेत्यांकडून दैनंदिन बाजार शुल्काची पावती फाडण्यात आली. मात्र, तरीही मनपाकडून कारवाई झाल्याने अनेक हॉकर्सने संतापात मनपा कर्मचाऱ्यांना विरोध केला. यामुळे या भागात तणावाचे वातावरण निर्माण झाले होते. तसेच माल जप्त करायचाच होता तर पावत्या का फाडल्या गेल्या, असाही प्रश्न हॉकर्सने उपस्थित केला. दरम्यान, काही हॉकर्सनी मनपा कर्मचाऱ्यांनी मालासोबत पैसे देखील जप्त केल्याचा आरोप यावेळी केला.

ट्रॅक्टरची चावी केली गायब

मनपा कर्मचाऱ्यांनी हॉकर्सकडून जप्त केलेला माल ट्रॅक्टरमध्ये जमा केल्यानंतर काही जणांनी ट्रॅक्टरची चावी गायब केली. यामुळे ट्रॅक्टर सुरू झाले नाही. त्यामुळे अनेक हॉकर्स आपला जितका माल वाचविता येईल, तितका वाचविण्याचा प्रयत्न केला. तसेच मनपाच्या पथकाने देखील अनेक हॉकर्सचा माल परत देखील केला. काही वेळानंतर ही चावी सापडली.