संचालक जयवंत भोईटेंच्या घरावर मध्यरात्री दगडफेक

फोटो

लोकमत न्यूज नेटवर्क

जळगाव : मविप्र संस्थेचे संचालक जयवंत बाबूराव भोईटे यांच्या घरावर रविवारी मध्यरात्री तीन तरुणांनी दगडफेक केल्याची घटना मुक्ताई नगरात घडली. दरम्यान, याप्रकरणी तालुका पोलिसांनी गुन्हा दाखल न करता अदखलपात्र गुन्ह्याची नोंद केली. त्यामुळे भोईटे यांनी पोलीस अधीक्षक यांच्याकडे तक्रार केली आहे.

जयवंत भोईटे यांनी दिलेल्या तक्रारीनुसार, संस्थेचे मानद सचिव नीलेश भोईटे यांनी केलेल्या गैरकारभाराबद्दल उच्च न्यायालय तसेच शासनाच्या विविध विभाग, पोलिसांकडे तक्रारी केल्या आहेत. त्यातून नीलेश भोईटे व त्यांच्या हस्तकांकडून वारंवार जीवे मारण्याची धमकी देण्यात येत आहे. नीलेश भोईटे यांच्या सांगण्यावरून रविवारी मध्यरात्री कल्पेश भोईटे व दोन अनोळखी तरुणांनी जयवंत भोईटे यांच्या घरावर दगडफेक केली. खिडकीच्या काचा फोडून घरात दगड फेकले. या हल्ल्यात जयवंती भोईटेंसह त्यांच्या कुटुंबातील महिला, लहान मुले बचावली. शेजारचे लोक झोपेतून उठून बाहेर आल्यानंतर दगडफेक करणारे तिघे पळून गेले. तत्पूर्वी त्यांनी जयवंत भोईटे यांना आठ दिवसात जीवे मारण्याची धमकी दिली आहे. या घटनेनंतर भोईटे यांनी तालुका पोलीस ठाण्यात तक्रार दिली आहे. संबंधित पोलीस कर्मचारी तायडे यांनी गुन्हा दाखल करून न घेता केवळ अदखलपात्र गुन्हा दाखल केला आहे. घटनेचे सीसीटीव्ही फुटेज ताब्यात न घेता चौकशी सुरू केली नाही. यासंदर्भात जयवंत भोईटे यांनी सोमवारी पोलीस अधीक्षक डॉ. प्रवीण मुंढे यांच्याकडे तक्रार केली आहे.

कोट...

आम्ही नाशिकमध्ये आहोत. न्यायालयात सुरू असलेल्या प्रकरणात सहानुभूती मिळविण्यासाठी जयवंत भोईटे यांनी केलेला हा बनाव आहे. यात तथ्य नाही.

- नीलेश भोईटे