आठवडाभरात चांदीच्या भावात दोन हजारांची घसरण

जळगाव : गेल्या काही दिवसांपासून सोने-चांदीच्या भावात सातत्याने घसरण सुरूच आहे. आठवडाभरात चांदीचे दोन हजार रुपये प्रतिकिलोने, तर सोन्याचे भाव एक हजार २०० रुपये प्रतितोळ्याने घसरले आहे. त्यामुळे शुक्रवारी चांदी ७१ हजार ५०० रुपये प्रतिकिलो तर सोने ४८ हजार ५०० रुपये प्रतितोळ्यावर आले. डॉलरचे दर कमी-कमी होत असल्याने सोने-चांदीच्या भावात घसरण होत असल्याचे सांगितले जात आहे.

कोरोना संसर्गामुळे निर्बंध काळात सोने-चांदीचे भाव चांगलेच वाढत गेले. अनलॉक होऊन सुवर्णपेढ्या सुरू झाल्या. त्यानंतर तीन ते चार दिवस सोने-चांदीत चांगलीच भाववाढ होत गेली. त्यामुळे १० जून रोजी चांदी ७४ हजार रुपये प्रतिकिलोवर पोहोचली होती, तर सोने ५० हजार रुपये प्रतितोळ्यावर पोहोचले होते. त्यानंतर मात्र घसरण सुरू झाली. आठवडाभराची स्थिती पाहता ११ जून रोजी ७३ हजार ५०० रुपये प्रतिकिलोवर असलेली चांदी १८ रोजी ७१ हजार ५०० रुपये प्रतिकिलोवर आली आहे. तसेच ११ जून रोजी ४९ हजार ७०० रुपये प्रतितोळ्यावर असलेले सोने १८ रोजी ४८ हजार ५०० रुपये प्रतितोळ्यावर आले आहे.

डॉलरच्या दराचा परिणाम

गेल्या आठवडाभरापासून अमेरिकन डॉलरचे दर कमी कमी होऊन भारतीय रुपया मजबूत होत आहे. त्यामुळे सोने-चांदीचेही भाव कमी होत असल्याचे सांगितले जात आहे. ७४ रुपयांच्या पुढे गेलेले डॉलरचे दर शुक्रवारी (दि. १८) ७३.९६ रुपयांवर आले.

आठवडाभरातील घसरण

दिनांक-सोने-चांदी

११ जून-४९,७००-७३,५००

१४ जून-४९,४००-७३,०००

१५ जून-४९,१००-७२,५००

१६ जून-४८७५०-७२,०००

१७ जून-४८,५००-७१,५००

१८ जून-४८,५००-७१,५००