शिरसोलीत एस.टी. आरक्षणाने वाजले फटाके

शिरसोली: शिरसोली प्र नं. येथील ग्रामपंचायत सरपंचपदाचे आरक्षण महिला एस. टी. (अनुसूचित जमाती) निघाले. परंतु निवडून आलेल्या उमेदवारांमध्ये एस. टी. महिला उमेदवारच नसल्याने व एकमेव एस.टी. पुरुष उमेदवार असल्याने गावात धुमधडाक्यात फटाके फुटून गुलाल उधळला गेला. परंतु तहसीलदारांनी महिलेचेच आरक्षण निघाले, असे जाहीर केल्याने सर्वत्र नाराजीचा सूर उमटत असून सरपंचपदाचे दावेदार एकमेव एस.टी. पुरुष असलेल्या उमेदवारालाच बहाल करण्यात यावे, अशी ग्रामस्थांची मागणी आहे.

शिरसोली प्र नं. ग्रामपंचायतीत एकूण सहा प्रभाग असून सहा प्रभागांमध्ये १७ ग्रामपंचायत उमेदवार निवडून आले आहेत. मागील वर्षी येथील सरपंच पद हे जनरल असल्याने यंदा सरपंचपदाचे आरक्षण हे एस. टी. महिला निघाले आहे. परंतु निवडून आलेल्या सतरा उमेदवारांमध्ये एकही एस. टी. महिला उमेदवार नाही. असे असले तरी या सतरा उमेदवारांपैकी एक उमेदवार हा एस.टी. पुरुष असल्याने निघालेल्या आरक्षणानुसार आपणच सरपंचपदाचे एकमेव दावेदार समजून आनंदाच्या भरात कार्यकर्त्यांनी गुलालाची उधळण करून फटाके फोडून टाकले. परंतु तहसीलदारांनी महिलेचेच आरक्षण निघेल, असे घोषित केल्याने एकमेव एस.टी. पुरुष उमेदवाराच्या आनंदावर विरजण पडल्याने प्रशासनाच्या विरोधात रोष व्यक्त करण्यात येत असून एस.टी. महिला उमेदवार नसताना महिलेचेच आरक्षण कसे काय काढले?. असा सवाल उपस्थितीत करून एस. टी. पुरुषाचे आरक्षण कायम करावे, अशी मागणी ग्रामस्थ, कार्यकर्ते यांच्याकडून केली जात आहे.

-------------------------

इतर उमेदवारांच्या अशा पल्लवित

निवडून अलेल्या १७ उमेदवारांमध्ये एकही एस. टी. महिला उमेदवार नसल्याने व तहसीलदारांनी महिलाच उमेदवाराचे आरक्षण निघेल, असे घोषित केल्याने नवख्या निवडून आलेल्या इतर महिला उमेदवारांच्या आशा पल्लवित झाल्या असून त्या दृष्टीने त्यांनी व्यूहरचना आखायला सुरुवातदेखील केली आहे. असे असले तरी आरक्षणाचा चेडू जिल्हाधिकारी यांच्याकडे असून जिल्हाधिकारी काय निर्णय घेतात याकडे संपूर्ण गावाचे लक्ष लागून आहे.