मेहरूण तलावात जाणारे सांडपाणी नाल्याकडे वळविणार

दोन कोटींची तरतूद करण्याचे महापौरांचे आदेश : पुढील महासभेत मिळणार मंजुरी

लोकमत न्यूज नेटवर्क

जळगाव : शहराचे वैभव असलेल्या मेहरूण तलावात गेल्या अनेक वर्षांपासून जात असलेल्या सांडपाण्यामुळे तलावाचे वैभव हरवले जात होते. याबाबत ‘लोकमत’ने प्रशासन व लोकप्रतिनिधींचे लक्ष वेधल्यानंतर मंगळवारी महापौर जयश्री महाजन यांनी तलावाची पाहणी करत सांडपाण्यावर कायमचा तोडगा काढण्यासाठी, तलावात जाणारे सांडपाणी नाल्याकडे वळविण्याचे आदेश मनपाच्या बांधकाम विभागाला दिले आहेत. यासाठी दोन कोटींची तरतूद करून आगामी महासभेत प्रस्ताव ठेवण्याच्या सूचना यावेळी त्यांनी प्रशासनाला केल्या.

गेल्या दोन दिवसांपासून ‘लोकमत’ने शहरातील मेहरूण तलावात जाणाऱ्या सांडपाण्यावर कायमचा तोडगा करण्याबाबत लोकप्रतिनिधींचे लक्ष वेधण्याचा प्रयत्न केला होता. तसेच सांडपाण्यामुळे मेहरूण तलावातील जैवविविधतेला निर्माण झालेल्या धोक्याकडे देखील लक्ष वेधले होते. अखेर या वृत्ताची दखल घेत मंगळवारी महापौर जयश्री महाजन व उपमहापौर कुलभूषण पाटील यांनी सायंकाळी पाच वाजता मेहरुण तलाव परिसराची पाहणी केली. यावेळी भारती प्रतिष्ठानच्या सुजाता देशपांडे, आनंद मल्हारा, माजी नगरसेवक विजय वाणी यांच्यासह मनपाचे शहर अभियंता अरविंद भोसले, प्रकल्प अभियंता योगेश बोरोले यांच्यासह मनपाचे आरोग्य विभागाचे कर्मचारी देखील उपस्थित होते. नेहरूनगर परिसरातून तलावात येणाऱ्या सांडपाण्याची महापौरांनी पाहणी केली. तसेच तलावात जाणारे सांडपाणी व्यवस्थापन करण्याबाबत मनपा अभियंता यांना सूचना दिल्या.

बंधाऱ्याच्या पलीकडील नाल्यामध्ये सांडपाणी वळवणार

नेहरूनगर परिसरातून येणारे पाणी तलावातच सोडण्याशिवाय दुसरा पर्याय या भागात नसल्याचे आढळून आले, या भागातील सांडपाणी दुसऱ्या ठिकाणी वळविण्याचा निर्णय घेतला तर त्यासाठी मोठा खर्च लागणार असल्याचे मनपा अभियंत्यांनी महापौरांना सांगितले. त्यावर महापौरांनी खर्चाचा विचार न करता तलावातील सांडपाण्यावर कायमचा तोडगा काढण्याचा सूचना दिल्या. त्यानुसार तलावाच्या बंधाऱ्याच्या बाजूला असलेल्या नाल्यात या भागातील सांडपाणी वळविण्याचा निर्णय घेण्यात आला. यासाठी अंदाजपत्रक तयार करण्याच्या सूचना उपमहापौर कुलभूषण पाटील यांनी मनपा अभियंत्यांना दिल्या आहेत. तसेच यासाठी अंदाजे दोन कोटींच्या खर्च अपेक्षित असून याबाबतचा प्रस्ताव महासभेपुढे ठेवण्याच्या सूचना देखील महापौरांनी दिल्या आहेत.