विजयकुमार सैतवाल,जळगाव : श्रीरामभक्तांच्या उत्साहाने वातावरण राममय झालेले असताना श्रीराम प्राणप्रतिष्ठा सोहळ्याच्या मुहूर्तावर सुवर्णनगरी जळगावात सोन्याचा मुलामा दिलेल्या अथवा चांदीच्या राम, लक्ष्मण, सीतामाता यांच्या मूर्ती तसेच विविध वस्तूंची खरेदी केली. गेल्या तीन ते चार दिवसांपासून या वस्तूंच्या खरेदीसाठी असलेला उत्साह सोमवार, २२ जानेवारी रोजीदेखील कायम राहिला.
श्रीराम प्राणप्रतिष्ठा सोहळ्यानिमित्त जळगाव शहर सजण्यासह फटाक्यांच्या आतीषबाजीने उजळून निघाले. त्यात या सोहळ्यानिमित्त सुवर्ण व्यावसायिकांनी सुवर्ण मुलामा असलेली श्रीराम मंदिराची प्रतिकृती, चांदीपासून तयार केलेल्या श्रीराम, सीतामाता, लक्ष्मण, हनुमान यांची मूर्ती, सुवर्ण मुलामा असलेली व आकर्षक साज चढवलेली मूर्ती, श्रीराम पादुका, सोने-चांदीचे शिक्के ग्राहकांसाठी उपलब्ध करून दिले.
गेल्या काही दिवसांपासून यांची खरेदी केली जात आहे. त्यात २२ जानेवारीला श्रीराम प्राणप्रतिष्ठा होत असताना या मुहूर्तावर ग्राहकांनी खरेदी केली. या सर्व वस्तू उपलब्ध असल्याने ग्राहकांना त्या सहज घेता आल्या, असे सुवर्ण व्यावसायिकांनी सांगितले.