भुसावळ न्यायालय आवारातून कैदी फरार

शौचालयाच्या खिडकीतून काढला पळ

भुसावळ - जळगाव कारागृहातून भुसावळ येथे न्यायालयात सुनावणीसाठी आणलेल्या दोन कैद्यांपैकी एकाने शौचालयाच्या खिडकीची लोखंडी ग्रील तोडून पळ काढल्याची घटना शुक्रवारी २ रोजी दुपारी घडली. या घटनेमुळे न्यायालय परिसरात पोलिसांची तारांबळ उडाली होती.
भुसावळ बाजारपेठ पोलिस ठाण्यात दाखल गुन्ह्यातील जळगाव कारागृहात बंदिस्त आसीफ बेग असलम बेग (बाबा काल्या ) व कलीम शेख या दोघांना दुपारी भुसावळ न्यायालयात आणले होते. दीड वाजेच्या सुमारास कलीम शेख हा जेवणास बसला. यावेळी ३ पोलीस त्याच्यासोबत होते. तर बाबा काल्या या आरोपीने शौचास जाण्याचा बहाणा केला. बराच वेळ झाल्यावरही बाबा काल्या बाहेर न आल्यामुळे त्यांनी बघितले असता बाबा काल्या हा खिडकीतून पसार झाला होता. बाबा काल्या विरुद्ध भुसावळ बाजारपेठ पोलिस ठाण्यात विविध गंभीर स्वरूपाचे गुन्हे दाखल आहेत. याप्रकरणी उशिरापर्यंत गुन्ह्याची नोंद नव्हती.