धावत्या रेल्वेत चढताना परप्रांतीय महिला जखमी

उपचार सुरू: रेल्वे मालधक्क्याजवळ सकाळची घटना

 जळगाव : बोईसर येथून बनारस जवळील आपल्या गावी निघालेल्या चौबे कुटुंबावर सोमवारी सकाळी आघात कोसळला. पाय मोकळे करण्यासाठी खाली उतरल्यानंतर अचानक सुरूझालेली रेल्वे गाडी पकडण्याच्या प्रयत्नात चौबे कुटुंबाची सर्कस सुरू झाली. यात पती,तीन मुले व सासरा यांनी गाडी पकडली. मात्र प्रियंका चंदन चौबे ही महिला गंभीर जखमी झाली. मुंबई येथील भिवंडी परिसरातील खाजगी कंपनीत कामाला जाणारे चंदन चौबे हे पत्नी प्रियंका चौबे, मुलगा दीपक, छोटू व जिया यांच्यासोबत रविवारी रात्री १२ वाजेच्या सुमारास एका एक्सप्रेसमध्ये बोईसर येथून बसले. सकाळी साडे सात वाजेच्या सुमारास ही एक्सप्रेस निमखेडी परिसरातील एक नंबर मालधक्क्याजवळ थांबली. रात्रभर बसून कंटाळा आलेल्या चौबे दाम्पत्य मुलांसह पाय मोकळे करण्यासाठी खाली उतरले. या दरम्यान अचानक रेल्वे सुरू झाल्याने पाचही जणांची धावपळ सुरू झाली. रेल्वे सुरू झाल्यानंतर तिला पकडण्याचा प्रयत्नात चंदन चौबे, मुलगी जिया, मुलगा दीपक, छोटू आणि सासरा हे यशस्वी झाले. या दरम्यान प्रियंका यांनी रेल्वेच्या मागे धावण्यास सुरुवात केली. मात्र त्या पायरीवरून खाली पडल्याने त्यांच्या डोक्याला, डाव्या पायाला, तोंडाला, दोन्ही हाताला मार बसला. जखमी अवस्थेत ही महिला गणेश कॉलनीलगतच्या रेल्वेरुळापर्यंत पायी चालत आली. मात्र जास्त रक्तस्त्राव झाल्याने काही वेळेनंतर तिला चक्कर येऊन ती बेशुद्ध पडली. नागरिकांनी जखमी प्रियंका चौबे यांच्याबाबत जिल्हापेठ पोलीस स्टेशनला माहिती दिली. त्यानुसार साहाय्यक फौजदार मनोज शहा व सहकार्‍यांनी तिला उपचारासाठी जिल्हा रुग्णालयात दाखल केले. या ठिकाणी डॉ.अजय सोनवणे यांनी तिच्यावर तत्काळ उपचार सुरू केले. काही वेळेनंतर ही महिला शुद्धीवर आली. या दरम्यान रुग्णालयातील काही जणांनी या महिलेच्या कुटुंबीयांशी संपर्क साधण्याचा प्रयत्न केला होता. या महिलेकडील मोबाईलवर काही वेळेनंतर पतीचा फोन आला. अपघाताबाबत महिलेच्या वडिलांना माहिती देण्यात आली आहे. त्यानुसार वडील जळगावकडे निघाले आहेत. तर पती चंदन चौबे हे मुलांना बनारस जवळील चैनपूर, खरीगमा या गावी सोडून जळगावकडे निघणार असल्याची माहिती सूत्रांनी दिली. संध्याकाळी या महिलेच्या प्रकृतीत काही प्रमाणात सुधारणा झाली. मात्र डोक्याला आणि चेहर्‍याला जबर मार बसल्यामुळे खूप वेदना होत असल्याचे तिने सांगितले. या प्रकरणी उशिरापर्यंत पोलिसात नोंद नव्हती. नातेवाईक मंगळवारी दुपारपर्यंत जळगावात दाखल होण्याची शक्यता आहे.