केशरी शिधापत्रिकाधारकांना स्वस्त धान्य मिळणार

अमळनेर तालुक्यातील एपीएल कार्डधारक शिधापत्रिका असून या योजनेतील लाभार्थ्यांच्या एकूण ६१ हजार ९७७ एवढ्या सदस्य संख्येत या योजनेची प्रथम मागणी करणाऱ्यास देणे या तत्त्वावर हे वितरण करण्यात येणार आहे. या योजनेचा लाभ घेण्याचे आवाहन तहसीलदार मिलिंदकुमार वाघ व पुरवठा निरीक्षण अधिकारी संतोष बावणे यांनी केले आहे. योजनेचा लाभ प्रत्येक एपीएल केशरी शिधापत्रिका धारकांना (शेतकरी योजनेत, प्राधान्य गटात समाविष्ट न झालेल्या) देण्यासाठी अमळनेर तहसील कार्यालयातील पुरवठा विभागाकडून रेशन दुकानदारांना सूचना देण्यात आलेल्या आहेत. सर्व एपीएल केशरी शिधापत्रिका धारकांना प्रतिमाह प्रतिव्यक्ती १ किलो गहू व १ किलो तांदूळ याप्रमाणे २ किलो अन्नधान्य माहे जून २०२१करिता सवलतीच्या दराने गहू ८ रुपये प्रतिकिलो व तांदूळ १२ रुपये प्रतिकिलो वितरण करण्याची सूचना रेशन दुकानदारांना करण्यात आलेली आहे.

तरी अमळनेर तालुक्यातील सर्व एपीएल केशरी शिधापत्रिकाधारकांनी या योजनेचा लाभ घ्यावा, असे आवाहन अमळनेर तहसीलदार मिलिंद कुमार वाघ व पुरवठा निरीक्षण अधिकारी संतोष बावणे यांनी केले आहे.