दोन अपघातात एक ठार, 10 जखमी

नंदुरबार : दोन वेगवेगळ्या अपघातात एक जण ठार, तर 10 जण जखमी झाल्याच्या घटना नवापूर तालुक्यातील चरणमाळ घाटात घडल्या.

पोलीस सूत्रांनुसार, नऊ-दहा प्रवासी असलेली जीप पिंपळनेर येथून नवापूरकडे जात होती. तेव्हा जीपचालकाचा वाहनावरील ताबा सुटला अन् जीप उलटली व त्याखाली चालक शिवा बुध्या राऊत (वय 45, रा. बसरावड, ता. साक्री, जि. धुळे) दाबला जाऊन त्याचा मृत्यू झाला. या घटनेत सात प्रवासी किरकोळ स्वरूपात जखमी झाले. नवापूर-पिंपळनेर रस्त्यावरील चरणमाळ घाटात ही घटना घडली. याप्रकरणी जेठीबाई शिवा राऊत यांनी नवापूर पोलिसात फिर्याद दिली.

दुसरा अपघातही चरणमाळ घाटात घडला. मालवाहू ट्रक (क्रमांक एमएच-18-एम-5479) धुळ्याहून नवापूरकडे जात होता. तेव्हा चालकाचा वाहनावरील ताबा सुटला व वाहन उलटले. त्यात चालकासह तीन जण जखमी झाले. यात चालक अमृत पृथ्वीराज सरोदे (वय 45), नारायण वामन भिंगाणे व महेश चंद्रालाल बुढाणी (सर्व रा. धुळे) यांचा समावेश आहे.